Elbasy belgili jazýshy Gerold Belgerdiń qaıtys bolýyna baılanysty onyń otbasyna kóńil aıtý jedelhatyn joldady, dep habarlady Prezıdenttiń baspasóz qyzmeti.
Memleket basshysy kóńil aıta otyryp, jazýshynyń dúnıe salǵany týraly habardy kúızele qabyldaǵanyn, búkil Qazaqstan mádenıetiniń aýyr qazaǵa dýshar bolǵanyn atap ótken.
«Gerold Karlovıchtiń Qazaqstanǵa degen sheksiz súıispenshilikpen órilgen ómiri shynaıy patrıotızmniń úlgisi bolyp sanalady. Onyń shyǵarmashylyq murasy bizdiń mádenıetimizdiń baǵa jetpes ıgiligine, al ómir jolyndaǵy rýhanı ar-namys qaǵıdattary ár kezeńniń urpaqtaryna jiger beretin baǵyt-baǵdarǵa aınaldy», – dep atap ótken Qazaqstan Prezıdenti.
Jedelhatta sondaı-aq G.Belgerdiń shyǵarmashylyǵymen ǵana emes, keremet adamgershilik qasıetimen, izgiligimen jáne ómirlik isine degen yjdahattylyǵymen este qalǵanyna nazar aýdarylǵan. Ol eldiń qoǵamdyq tirshiligine belsene aralasty, onyń isi men oı-tujyrymdary árdaıym tatýlyqty, meıirim men rýhanı qundylyqtardy ornyqtyrýǵa baǵyttaldy.
«Gerold Karlovıchtiń eńbegi joǵary memlekettik marapattarmen atap ótildi, Prezıdenttiń Beıbitshilik pen rýhanı kelisim syılyǵynyń laýreaty boldy. Onyń jarqyn beınesi qazaqstandyqtardyń jadynda máńgi saqtalatyn bolady», – delingen jedelhatta.