Shıeli aýdany ortalyǵy men aýyldarynda turatyndardyń kópshiligi kóliginiń akkýmýlıatorynan aqaý baıqalyp, dóńgelegi syr berse birden Nurjamal Omarovany izdeıdi. Bul is tek er adamǵa tán jumys emestigin dáleldep júrgen keıipkerimiz kúnine on shaqty kóliktiń dóńgelegin jóndep beredi.
Jańaqorǵandyq Sabyrhan Ahanov pen Nurjamal Omarova kóńil jarastyryp, shańyraq qurǵan soń jumys babymen Shıeli kentine kóship keledi. Kóp keshikpeı-aq onsyz da kóbesi sógilip turǵan keńes odaǵy qulap, naǵyz «Balapan – basyna, turymtaı – tusyna» deıtin zaman bastalyp ketti. Osy tusta azamaty Sabyrhan beldi býyp, jan-jaqtan qurylǵy aldyryp, aýdan ortalyǵynda alǵashqylardyń biri bolyp dóńgelek jelimdeıtin ortalyq ashty. «Eńbek eptilikti súıedi» degen. Az jylda sharýasy ońǵa basqan olardy kentten bólek aýyldardan da izdep keletinder kóbeıdi. Biraq 2012 jyly Sabyrhan aıaqasty aýyryp, otbasylyq kásip toqyrap qalǵandaı bolyp edi. Sol tusta aýdandyq mádenıet úıindegi jumysyn tastaǵan Nurjamal kólik jóndeý ortalyǵynyń jumysyn jalǵastyryp áketti.
«Jumystyń barysyn kórgen bólek te, óziń qolǵa alyp istegen bir basqa. Bastapqyda klıentter qyzyqtap qarap turǵanda qolym júrmeı, qınalǵanym ras. Keıin úırenip kettim. Tipti osy kúnge deıin «akkýmýlıator isteıtin bala kerek edi», «dóńgelekti teńestirip beretin mamandy shaqyrsańyz» dep keletin beıtanystar bar. Ondaıda birden jumysqa kirisip ketemin, klıentter «apaı, shynymen siz isteısiz be?» dep tańǵalyp surap jatady. Kezinde zildeı dóńgelekterdi ázer kóteretinbiz. Ony qolmen ashýdyń aýyrlyǵy bir bólek áńgime. Keıin tehnologııa jańaryp, jumys áldeqaıda jeńildedi. Áýelgide qyzdarym qolǵabys etti, qazirgi kómekshim – ulym. Olar da osy kásiptiń qyr-syryn úırenip ósti», deıdi N.Omarova.
Ádette munda kóktem men kúzdiń qysqa ulasar shaǵynda jumys qyza túsedi. Dóńgelek aýystyrýǵa kelgen ár klıenttiń tapsyrysyn múltiksiz atqaratyn maman olardyń árdaıym aman júrýine tilekshi bolyp otyrady. Shúkir, osy ýaqytqa deıin jurttyń renishin estigen kezi joq. Qaıta keıde ózinen aqyl surap keletinder kóp. Olar ákelgen aýyr tehnıkanyń dóńgelegin jelimdeýdiń joldaryn kórsetip, bilgenin úıretedi.
«Qazir kóp balalar jumys izdep, shetelge ketip jatyr. Kózin tapsań elde de atqarar sharýa az emes. Biraq «Aýyrdyń ústimen, jeńildiń astymen» júrýdi ádet etken qazirgiler ballon, kamera jamaý, akkýmýlıator jóndeý sekildi kásipten alty shaqyrym aýlaq júredi. Qarap otyrsańyz, solardyń kóbiniń áleýmettik jeliden basqa ermegi joq. Sonyń sońyna túskenderdiń mıllıondar ustap jyrǵap otyrýynan qolyndaǵysynan qıdaı sypyrylyp aıyrylyp qalýy tez. Bul endi beınetsiz bereke kirmeıtininiń belgisi. Sony aıtatyn úlkender az emes, biraq uǵyna qoıatyn jas ta bolmaı tur... Joldasym aýyryp, bar is maǵan qarap qalǵan kezde qyzdarym kómektesti. Olar ákesiniń qasynda júrip kórgenin kókeılerine túıe beripti. Úıdegi bes bala da eńbekke beıim bolyp óskenine shúkirlik aıtamyn», deıdi keıipkerimiz.
Shúkir, osy kásippen júrip balalardy jetildirdi. Qazir olardan taraǵan 14 nemereniń ortasyndaǵy baqytty áje. Túrli merekelerde jergilikti ákimdik saltanatty keshterden qaldyrmaı, qurmet kórsetedi. Jaqynda ǵana ótken sondaı bir jıynda «Isker kóshbasshy» atalymymen marapattaldy. Bul da bolsa eńbekpen shyqqan tórdiń qashanda bıik bolatynynyń dáleli.
Qyzylorda oblysy,
Shıeli aýdany