Jany názik demeseńiz, áıel balasy qoǵamnyń qaı salasynda da erlermen ıyq tirestire eńbek etip keledi. Temirdeı tártip ornaǵan mekemege jyp-jyly shýaq syılap júretin de solar. Bizdiń aınalamyzda mundaı qaısar hanymdar az emes. Uzaq jyldar boıy Keden salasynda tabysty eńbek etip júrgen Bıbigúl Turysbekqyzynyń ómir ónegesi san synaqtan súrinbeı ótip, jigeri muqalmaǵan qaıratty jannyń jarqyn úlgisin kóz aldymyzǵa ákeledi.
Eńbek jolyn joǵary oqý ornynda muǵalim bop bastaǵan keıipkerimizdiń Keden salasyna kelýi kezdeısoq emes. Taǵdyr qosqan serigi Bolat Musabekovtiń jumys babymen shekara shebindegi Dostyq beketine qonys aýdaryp, qalalyq jaıly ómirdi artqa tastaǵan erli-zaıyptylar armanǵa birge qanat qaqqan. Bolat – keden ınspektory, Bıbigúl mektepke muǵalim bolyp ornalasty. Taǵdyr tartýymen Aısulý men Júsip esimdi ul-qyzdary ómir esigin ashty.
Ol kezde qytaı shekarasyna jaqyn stansııaǵa kedendik ınspektor bolyp qyzmetke turǵan jas mamandy aldaǵy ýaqytta qandaı synaq kútip turǵany beımálim edi. О́mirge qushtar azamattyń armany Dostyq-Úsharal tas jolyndaǵy qarly boranda úzildi. Qapııada jarynan aıyrylý Bıbigúl hanymǵa úlken soqqy boldy. «Qaıǵyny kótergen adam shyńdalady» degendeı, keler kúnnen úmit úzbegen ol shıetteı eki balasynyń bolashaǵy úshin kúıeýiniń jumysyn jalǵastyrýǵa bel býady. 2002 jyly keden salasyndaǵy jaýapkershiligi mol jumysqa kirisedi. Sol sátten bastap onyń ómiri jańa arnaǵa tústi.
«О́tken kúnderdiń elesin sholyp ótkende, kóńilge kóp oı oralady. Basqa túsken synaq adamdy qaırattandyrady eken. Aýyr jeldiń ótinde júrip, alǵa umtyldym. Quladym, qaıta turdym. Qudaı adamǵa kótere almaıtyn synaq bermeıdi degeni ras eken. Azamatymnyń oshaǵyn óshirmeı, ul-qyzyn aıaqtandyryp, adal eńbegimniń jemisin kórip otyrmyn», deıdi Bıbigúl Turysbekqyzy.
Ol Dostyq stansııasyndaǵy jumysyn 2012 jylǵa deıin jalǵastyryp, 2012 jyly keden qyzmeti qaıta uıymdastyrylǵan tusta Almaty oblysy boıynsha Memlekettik kirister departamentiniń bas mamany qyzmetine kiristi. Eńbegi janǵan bilikti mamandy áriptesteri men ortasy óz isiniń bilgiri retinde qurmetteıdi. Keıipkerimizdiń qyzmet joly 2013 jyly Qorǵas kedeninde bas maman, keıinirek «Qorǵas-Shyǵys qaqpasy» Halyqaralyq yntymaqtastyq ortalyǵynda jáne Qaljat keden beketinde jalǵasyn tapty. Onyń eńbek joly «maqsatqa umtylǵan adam jetistikke jetedi» degen sózdiń dáleli ispetti.
Shekara shebinde eńbek etý úlken kúshti qajet etedi. Qajyr-qaıratyń men densaýlyǵyńdy da sarp etetin sátter az emes. 2022 jyly Altynkól keden beketinde qyzmet atqaryp júrgende Bıbigúl Turysbekqyzy mı arterııalarynyń trombozynan ınsýlt aldy. Bul oǵan aýyr synaq boldy, biraq «rýhtyń kúshimen aýrýdy da jeńýge bolady» degendeı, myqty erik-jigeri men otbasynyń qoldaýy oǵan dem berdi. Syrqatynan aıyǵyp, súıikti jumysyna qaıta oraldy. Kúni búgin ol Jetisý oblysyndaǵy «Altynkól jol» keden beketindegi qyzmetin jalǵastyryp keledi.
О́z isine janymen berilgen maman uzaq jylǵy eńbeginiń arqasynda zor qurmetke ıe boldy. Keden organdaryndaǵy 10 jáne 20 jyl minsiz qyzmeti úshin medaldarymen, keden qyzmetiniń 30 jyldyǵyna arnalǵan mereıtoılyq medalmen, sondaı-aq «Ofıserdiń anasy» medalimen marapattaldy. «Eń úlken eńbek – urpaq tárbıesi» degen ol, balalarynyń ómirden óz jolyn tapqanyna qýanady. Búginde qyzy Aısulý Almatydaǵy Qytaı bankinde jetekshi aýdıtor bolyp eńbek etse, uly Júsúp Sybaılas jemqorlyqqa qarsy qyzmette kapıtan sheninde.
Myqty maman – qaı ujymnyń da maqtanyshy. Qýatty qurylymnyń tynys tirshiligin tereń sezinetin Bıbigúl Turysbekqyzyn kóktem merekesimen quttyqtap, el ıgiligi jolyndaǵy eńbegińiz elene bersin dep tilek aıtamyz!