Eńbek jolyn endi bastaǵan, baspana satyp alýǵa jaǵdaıy joq jas mamandarǵa járdemdesý maqsatynda elimizde birneshe jyl buryn satyp alý quqyǵynsyz jalǵa beriletin turǵyn úı baǵdarlamasy iske qosyldy. Bul qadam jastarǵa páterdi naryqtyq baǵadan edáýir tómen jeńildikti baǵamen jaldap, keıin óz baspanasyn satyp alý úshin qarajat jınaýǵa jaqsy múmkindik berdi.
Jyljymaıtyn múliktiń joǵary baǵasy, ıpotekalyq nesıeleýdiń kúrdeli sharttary, tómen bastapqy jalaqy jas mamandardyń jeke baspanaǵa qol jetkizýin is júzinde qıyndatady. Osyǵan baılanysty júzege asyrylǵan jaldamaly turǵyn úı baǵdarlamasy jumys isteıtin jastardyń turmysyna – tireý, mansabyna medeý bolyp, biraz aýyrtpalyqtan qutqarǵany belgili. 29 jasqa deıingi turaqty jumysy, rastalǵan tabysy bar jastardy qoldaýǵa baǵyttalǵan bastamada jumys ótili, tabys deńgeıi, otbasylyq jaǵdaıy, balalarynyń bolýy syndy tańdaýdyń negizgi ólshemsharttary belgilendi.
Basymdyq bilim, densaýlyq saqtaý jáne mádenıet sııaqty áleýmettik mańyzy bar salalarda jumys isteıtin jas mamandarǵa berildi. Tıisinshe, Úkimet jaldamaly turǵyn úıdi salý men satyp alýǵa, sondaı-aq jaldaý aqysyn sýbsıdııalaýǵa qomaqty qarajat bólip, myńdaǵan jasty qoljetimdi baspanamen qamtamasyz etý josparyn júzege asyrdy. 10 myńnan asa jas memlekettik qordan bólingen páterlerdi ýaqytsha paıdalaný arqyly jeke baspana satyp alý úshin qarajat únemdeýge múmkindik aldy. Baǵdarlamanyń negizgi máni boıynsha 5 jyldyq merzimde jumys isteıtin jastar keıinnen óz baspanasyn satyp alý úshin bastapqy jarnaǵa jınaq júrgizýi kerek.
Bastama elimizdiń negizgi qalalarynda – Astana, Almaty, Shymkentte iske asyryldy. Bar áleýet shoǵyrlanǵan iri qalada aı saıynǵy aqysy 5000-15000 teńge tóńiregindegi otbasy bıýdjetine salmaq túsirmeıtin jaldamaly páter ekiniń birine buıyra bermeıdi. Endi kóp otbasynyń kóńiline úmit uıalatyp, baspanaly bolýyna yqpal etken baǵdarlama aıaqtalýǵa taıaý. Turǵyn úı zańnamasynyń talaptaryna sáıkes, bosatylǵan turǵyn úıler muqtaj azamattarǵa berilmek. Alaıda jalǵa alýshylardyń kópshiligi úırenip qalǵan ornynan kóshýge daıyn emes. Olar alǵashqy jarnaǵa qajetti somany jınap úlgermegenin, qaıtadan qoljetimdi baspana tabý máselesine tap bolatynyn aıtyp, jaldamaly páterlerdi satyp alýǵa múmkindik berýdi suraıdy. Túrli satylarǵa jumys isteıtin jastardan jalǵa beriletin páterlerdi ıpotekada jeńildikti sharttarmen satyp alý quqyǵyn berý nemese jaldaý merzimderin uzartý týraly ótinishter túsip jatyr. Biraq qoldanystaǵy zańnama sheńberinde olardyń talaptaryn qanaǵattandyrý múmkin emes. Jumys isteıtin jastar retinde turǵyn úı alǵan barlyq azamattarmen satyp alý, uzartý quqyǵynsyz turǵyn úılerdi jaldaý sharttaryna qol qoıylyp, páter berý kezinde baǵdarlamanyń talaptary túsindirilgen.
Almaty qalasy kommýnaldyq ınfraqurylymdy damytý basqarmasy basshysynyń orynbasary Ǵalymjan Ábdishúkirulynyń aıtýynsha, bıyl baǵdarlama sharttary boıynsha birinshi 1 050 páterdi jalǵa alýshylar turǵyn úıdi bosatýy kerek, onyń ishinde 681 sharttyń merzimi aıaqtalǵan. Jaldaý sharttarynyń talaptaryn saqtaý maqsatynda ákimdik jalǵa alýshylardy kezeń-kezeńimen kóshirý boıynsha sharalar qabyldaıtyn bolady, páterlerdi erikti túrde bosatýdan bas tartqan jaǵdaıda daýlar sot tártibimen qaralady.
Qala ákimdigi baǵdarlamaǵa qatysýshylardyń máselesin sheshý úshin qosymsha qoldaý joldaryn qarastyryp, qalalyq «Almaty jastary» jeńildikpen nesıe berý baǵdarlamasynyń múmkindigin keńeıtti. Nátıjesinde, 25 adam 18 mln teńgege deıingi somaǵa turǵyn úı qaryzdaryn alyp, óz baspanasyna qol jetkizdi. «Otbasy bankimen» jasalǵan Yntymaqtastyq kelisimi arqyly jumys isteıtin jastar baǵdarlamasyn jalǵa alýshylar úshin 1050 qaryz mólsherinde kvota qarastyrylǵan. Sondaı-aq bıyl jyl basynan «Otbasy bankimen» kelisim boıynsha jalǵa alýshylardyń tólem qabilettiligin aldyn ala baǵalaý maqsatynda baǵdarlama jalgerlerin qabyldaý uıymdastyryldy. Ákimdik jalǵa alýshylarmen birneshe kezdesý ótkizip, qoldanystaǵy turǵyn úı zańnamasyn jan-jaqty túsindirdi. «Almaty jastary» baǵdarlamasynyń qashan iske qosylatyny jýyq arada habarlanady. Sonymen birge ótinishter men qujattardy qabyldaý naýryz aıynyń sońyna qaraı bastalady.