Parlamenti Senatynyń Áleýmettik-mádenı damý jáne ǵylym komıtetiniń keńeıtilgen otyrysynda «Qazaqstan Respýblıkasynyń keıbir zańnamalyq aktilerine deneshynyqtyrý jáne sport, sondaı-aq artyq zańnamalyq reglamentteýdi bolǵyzbaý máseleleri boıynsha ózgerister men tolyqtyrýlar engizý týraly» zań qaraldy.
Otyrys barysynda zańnyń negizgi mazmuny talqylandy. Onda ulttyq quramalardyń jetistikteri negizinde sporttyń basym túrlerin anyqtaý, sport federasııalarynyń mártebesin ózgertý, joǵary jetistikke jetken sportty qarjylandyrý, sondaı-aq sport uıymdarynyń qyzmetin retteýdi kúsheıtýge mán berildi. Federasııalardy tirkeý, memlekettik deneshynyqtyrý-sport uıymdarynyń basshylaryn rotasııalaý júıesin engizý máselelerine erekshe nazar aýdaryldy.
Depýtattar bıýdjetten qarjy bólýdi ońtaılandyrý zańnyń mańyzdy bóligi ekenin atap ótti. Atap aıtqanda, Qazaqstan azamattary emes sportshylardy memleket qarjysy esebinen qarjylandyrýǵa tyıym salý, sondaı-aq qarjyny balalar men jasóspirimder sportynyń paıdasyna qaıta bólý kózdelip otyr.
Zańǵa sonymen qatar týrızm jáne sport mınıstrliginiń quzyretin, sondaı-aq sport medısınasy men ońaltýdy damytýǵa baǵyttalǵan erejelerdi naqtylaý jónindegi túzetýler de engizilgen.
Otyrys sońynda deneshynyqtyrý men sportty damytýdyń keshendi tásili óńirlerdegi ekonomıkalyq jaǵdaıdy jaqsartýǵa, jańa jumys oryndaryn ashýǵa, sondaı-aq Qazaqstannyń halyqaralyq sport arenasyndaǵy ornyn nyǵaıtýǵa múmkindik beretini atap ótildi.