Astanalyq Ámir Nurbolatuly Bishkek qalasynda ótken «I halyqaralyq balalar arasyndaǵy ulttyq delfıı oıyndary» baıqaýynda jeńis tuǵyrynan kórindi. Bul saıysta qola medalǵa qol jetkizýdiń ózi úlken jetistik. О́ıtkeni osynaý talanttar taıtalasyna 8 memlekettiń eń úzdik ónerpaz órenderi jınalǵan.
11 jasar Ámir baıqaýdyń birinshi kezeńinde halyq áni «Aqerke» men Qyzyl Turdalyulynyń «Oı kók» shyǵarmasyn oryndap, tyńdarman rızashylyǵyna bólendi. Osylaısha, ol qazylar alqasynyń sheshimimen saıystyń ekinshi kezeńine joldama aldy. Fınalda da tosylǵan joq. Ámir sahnada halyq áni «On alty qyz» ben Ǵarıfolla Qurmanǵalıevtiń «Ánshi daýysyn» áýeletti. Onyń sulý daýsy, dombyra shertisi tyńdarmandy tartyp áketti.
«Bul baıqaý – ónerli órenderdiń naǵyz synalatyn kezi. Bıyl alǵash ret uıymdastyrylǵan saıysqa Reseı, Túrikmenstan, Ázerbaıjan, Belorýssııa, Qyrǵyzstan, О́zbekstan, Armenııadan iriktelgen úmitkerler keldi. Árqaısysy jeńisten dámeli. Biz dástúrli án atalymynda baq synap, 25 saıyskerdiń ishinen úzdik úshtikke endik. Árıne, qýanyshymyzda shek joq. О́ıtkeni tól ónerimizdi, dombyramyzdy ózge jurttar aldynda abyroıly pash ettik. Qazir estradalyq baǵyttaǵy aqyly festıvaldar óte kóp. Biraq osyndaı naǵyz kásibı jarystar az. Sonyń ishinde dástúrli ánderge basymdyq beretin halyqaralyq baıqaýlar joqtyń qasy. Osy saıysta biz de ózge jurttyń ónerin kórip, olarmen pikir almasyp biraz tájirıbe jınadyq. Aldaǵy ýaqytta budan bıik belesti baǵyndyramyz. О́ıtkeni 6 jasynan qolyna dombyra ustap, án salǵan Ámirdiń bolashaǵynan úlken úmit kútemiz», deıdi jeńimpaz jetekshisi, Astana qalasy ákimdiginiń «№1 balalar mýzyka mektebi» dástúrli án mamandyǵynyń pedagogi Ahmedııar Nurdáýlet.