Mańǵystaýda mamyr aıynyń 17-18 kúnderi qyzyqty sporttyq is-shara ótedi. «Tour De Bozjyra» velojarysy – salamatty ómir saltyn, sportty nasıhattaıtyn belsendi jandardy biriktiretin, óńir týrızmin tanytatyn mańyzdy doda. Jarysqa qatysýshylarǵa batys óńirimizdiń, sonyń ishinde Mańǵystaýdyń kórikti tabıǵı oryndaryna sapar shegý usynylady.
Sportshylar birinshi kúni, 17 mamyrda uzyndyǵy 150 shaqyrymdyq qashyqtyqta, Jańaózennen Bozjyraǵa deıin jarysady. 18 mamyrda Aqtaýdan TetysBlu taqyryptyq saıabaǵyna deıin 35 shaqyrymdy baǵyndyryp, márege jetedi.
«Jeńiske jetý ońaıǵa túspeıdi. Qozǵalys baǵdary kúrdeli. Qatysýshylardyń kelesi mejege deıin jolda aıaldap, demalyp, tamaqtanýyna arnalǵan aıaldamalar qarastyrylǵan. «Rixos Water World Aktau» qatysýshylardyń qaýipsizdigin qamtamasyz etedi. Medısınalyq jáne tehnıkalyq qoldaý da oılastyrylǵan. Sonymen qatar sportshylarǵa arnaıy baǵdarlanǵan ekskýrsııa aıasynda Bozjyra panoramasyna barý múmkindigi beriledi. Barlyq qatysýshylarǵa estelik medaldar tabystalady», deıdi uıymdastyrýshylar.
Velojarys Bozjyranyń boz jolymen sapar shegemin deýshiler úshin qyzyqty, ári este qalarlyq is-shara bolatyny anyq.
Mańǵystaý oblysy