Aqtóbe oblysynda ejelgi ǵun taıpalarynyń qonystaryn anyqtaýǵa baılanysty 2020–2023 jyldary erekshe qarqynmen bastalǵan qazba jumystary búginde saıabyrsydy. Sol jyldary Oıyl aýdanyndaǵy Saraljyn aýylynda, Kóptoǵaı aýylynyń Shóptigólinde, Sh.Bersıev atyndaǵy aýyldyq okrýgtiń Qazdyaralynda ǵun-sarmat taıpalarynyń obalary, naıza ushtary, qumyralar men áshekeı buıymdary kóptep tabyldy.
«О́tken jyly Oıyl aýdanynyń Kósembaı aýylyna jaqyn jerdegi Aqbulaq qorymy qazyldy. Bul – Oıyl men Qıyl ózenderiniń ortasyndaǵy ejelgi adamdar turaǵy. Aqbulaq ta ertedegi ǵun birlestiginiń qorymy. Qazba jumystary kezinde tabylǵan jádigerler shamamen III–IV ǵasyrda ǵun taıpalary Eýropaǵa attanar aldynda bizdiń jerimizge aıaldap, birlestik qurǵanyna dálel bolady. Aslan Mamedov bastaǵan arheologter Áıteke bı, Qobda, Oıyl aýdandarynan ǵun-sarmattardyń qorǵan-obalaryn taýyp, kartasyn jasady», deıdi Oıyl aýdandyq Shyǵanaq Bersıev atyndaǵy óner jáne ólke tarıhy mýzeıiniń ǵylymı qyzmetkeri Dýlat Isabaev.
Sýrettegi – Qaratal aýylynan úsh shaqyrym jerdegi Qazdyaraldaǵy ejelgi adamdar turaǵynan tabylǵan qumyra. Bul jerden aralary óte jaqyn ornalasqan úsh jerleý orny shyqty. Úshinshi shuńqyrda eresek adam men sopaqsha basty jasóspirim jerlengen oba erte dáýirde tonalǵan eken. Mundaǵy eresek adamnyń bas súıegi joq. Sábı kezden balanyń basyn qatty etip tańyp, sopaqsha etip úlkeıtý ǵun dáýirindegi aqsúıekter dástúrine tán joralǵy. Ǵun balasy joryqta qaıtys boldy ma, álde ózen boıynda aıaldaǵanda opat boldy ma, álde osy jerdi mekendegen taıpa kóseminiń balasy ma? Bul jaǵy belgisiz. Oblystyq tarıhı-ólketaný mýzeıiniń arheologteri Qazdyaralda erte qola, temir dáýirleri men erte orta ǵasyr zamanynyń jerleý oryndary qatar jatyr dep qorytyndy jasady.
Aqtóbe oblysy