Qazaqtyń keń dalasyna kóktemniń alǵashqy lebi esip, tabıǵat qaıta oıanǵanda, el ishinde erekshe meıram toılanady. Bul – Amal merekesi. Ony halqymyz yqylym zamannan beri qasıetti dástúr retinde qasterlep keledi. Sebebi Amal – tabıǵat ǵana emes, adam jany da jańaryp, júrekterdiń toǵysyp, baýyrmaldyqtyń bekemdeletin kúni.
Amal kúni erte tańnan esik ashylyp, tór kórikti bolady. Kishi úlkenniń aldyna baryp, sálem berip, «Bir jasyń qutty bolsyn!», «Amal merekesi qutty bolsyn!» dep aqjarma tilegin arnaıdy. Al aq saqaldy qarııalar men aq jaýlyqty analar bata berip, eldiń birligi men berekesin tileıdi. Bul kúni tek qol alysyp, tós qaǵystyrý emes, júrekten shyqqan shynaıy sóz ben meıirimniń tolqyny adamdardy jaqyndastyrady. Jyl boıy kórispegen aǵaıyn qaýyshyp, burynǵy ókpe-renishin keshirip, aq kóńilmen jańa jyldyń esigin ashady.
Ertede bir dana qarııa bolypty. Ol ár kóktem kelgen saıyn aýyldaǵy jastardy jınap:
– Balalarym, kúnniń shýaǵy jerdi jibitse, adam balasynyń júregin ne jibitedi, bilesińder me? – dep surapty.
Jastardyń biri:– Jyly sóz, aq tilek, – dese, biri:– Shynaıy keshirim men meıirim, – dep jaýap beripti.
Qarııa kúlimsirep:– Durys aıtasyńdar, qaraqtarym. Kóktem tabıǵatty túletedi, al Amal – adamnyń janyn jańǵyrtady. Kórisý – tek qol alysý emes, júrektiń tazarýy, renish pen ókpeni umytyp, aǵaıynmen qaıta tabysý. Janyńdaǵy adamǵa jylý syılaı alsań – naǵyz adam bolǵanyń, – depti.
Sodan beri bul sóz el ishinde danalyqqa aınalyp, Amal kúni adamdar bir-birine keshirim men izgilik syılap, renishti umytyp, jańa jyldy aq kóńilmen qarsy alýdy dástúr etken eken.
Sonymen qatar bul kúndi Uly Dala tósinde erkin ómir súrgen halyqtyń tabıǵatpen úılesim tapqan ómir saltynyń kórinisi desekte bolady. Sebebi qar erip, jer býsanyp, tirshilik ataýly qaıta túlegen shaqta, adamzat ta janyn tazartyp, ishki dúnıesin jańǵyrtady. Júrekke jylylyq uıalatyp, tatýlyq pen meıirim saltanat qurǵan osynaý mereke ǵasyrdan ǵasyrǵa jalǵasyp, qazaq halqynyń rýhanı baılyǵyn eseleı tústi.