Keıingi jyldary jergilikti atqarýshy bıliktiń yqpalymen baspana kezeginde turǵan qala turǵyndarynyń máselesi ońynan sheshile bastady. Páter alýdy armandaǵan bir top otbasynyń armany oryndaldy. Oblys ortalyǵynda 160 páterli turǵyn úı paıdalanýǵa berilip, ondaǵan otbasy qonys toıyn toılady.
Páterler 2012–2015 jyldary baspana kezegine turǵan muqtaj otbasylarǵa buıyrdy. Olardyń qatarynda kópbalaly analar, II top múgedekteri, tolyq emes otbasylar, jetim balalar, soǵys ardagerlerine teńestirilgen azamattar bar.
Jańa páterge qol jetkizip, qonys toıyn toılaǵan otbasylardyń qýany-shyna óńir basshysy Erbol Qarashókeev ortaqtasyp, Memleket basshysynyń tapsyrmasy aıasynda qolǵa alǵan jumys ári qaraı jalǵasyn tabatynyn aıtyp, turǵyndardy qýantty.
«Memlekettik saıasattyń basym baǵytynyń biri – áleýmettik osal toptardy baspanamen qamtamasyz etý. Halyqty turǵyn úımen qamtý jumysy Prezıdent Qasym-Jomart Toqaevtyń nazarynan tys qalǵan emes. Sondyqtan bul baǵyttaǵy jumys aldaǵy ýaqytta da úzdiksiz júrgiziledi. Jańa páterge ıe bolǵan barlyq otbasyny qýanyshymen quttyqtaımyn. Shańyraqtaryńyzdan shattyq úzilmesin», degen oblys basshysy páter kiltterin, turmystyq tehnıkanyń sertıfıkatyn tabystady.
Birer jyl buryn qurylysy bastalǵan, «Uly dala» shaǵyn aýdanynda ornalasqan turǵyn úıdiń jalpy aýdany – 9 600 sharshy metr. Kóppáterli turǵyn úı qurylysyn «Aulet Story Taraz» JShS júrgizdi. Turǵyndarmen birge sý jańa turǵyn úıdi aralap kórgen óńir basshysy Erbol Qarashókeev páterlerdiń sapasyna aıryqsha nazar aýdardy. Keıinnen jańadan salynǵan turǵyn úı mańyna 20 túp aǵash otyrǵyzyldy.
«Ár adam óz shańyraǵynyń bolǵanyn qalaıtyny belgili. «О́z úıim – óleń tósegim» degen sóz beker aıtylmaǵan ǵoı. Búgin mine, uzaq jyl boıy saryla kútken páterdiń kilti qolymyzǵa tıip, tóbemiz kókke jetip, qýanyp otyrmyz. Kópbalaly analarǵa aıryqsha qamqorlyq kórsetip jatqan Memleket basshysyna, óńirdegi atqaminer azamattarǵa aıtar alǵysym sheksiz. Mundaı baspana páterge muqtaj árbir otbasyǵa buıyrsyn degen tilek bar», deıdi kópbalaly ana Móldir Shadmanova kóńilin kernegen shattyq sezimin bólisip.
Jergilikti atqarýshy bılik ókilderi keltirgen derekke sensek, bıyl óńirde 765 myń sharshy metr turǵyn úı salynady, 2 390 páterli 50 turǵyn úı paıdalanýǵa beriledi. Sondaı-aq turǵyn úı kezeginde turǵan halyqtyń áleýmettik osal toptaryna 4,9 mlrd teńgege 361 páter satyp alý josparlanǵan.
TARAZ