Memleket basshysynyń bastamasymen qolǵa alynǵan «Jumysshy mamandyqtary jyly» aıasynda Úkimet tehnıkalyq mamandardy qoldaý sharalaryn memlekettik deńgeıde júrgize bastady.
Premer-mınıstr Oljas Bektenovtiń tapsyrmasymen «Otbasy bank» «Naýryz» baǵdarlamasynyń jańa baǵyty – «Naýryz jumyskerdiń» iske qosylǵanyn jarııalap, jumysshy mamandardy baspanamen qamtý máselesin tııanaqty túrde qolǵa almaq. Baǵdarlama ónerkásip, energetıka, kólik, aýyl sharýashylyǵy, qurylys jáne sý resýrstary salasy qyzmetkerlerin qamtıdy. Bıyl «Naýryz jumysker» aıasynda jumysshy mamandarǵa 72 mlrd teńge kóleminde 2 440 nesıe berý josparlanyp otyr.
Memlekettik deńgeıdegi bastamanyń taǵdyry ishki naryqtan qoldaý tapqanda ǵana baıandy bolmaq. Alǵashqylardyń biri bolyp qytaılyq iri temirjol holdıngi «GK Railways»-pen birlesip qurylǵan BENT kompanııalar toby jańa baǵdarlama aıasynda qyzmetkerlerin turǵyn úımen qamtýǵa kiristi. Kompanııa joǵary jyldamdyqty júrdek poıyzdardyń temirjoly úshin jasalatyn jol qurylymynyń materıaldaryn daıyndaýmen jáne jetkizýmen aınalysady. Olar ónimderin álemniń 15-ten astam eline, onyń ishinde AQSh, Ispanııa, Italııa, Anglııa, Ońtústik Amerıka jáne Qazaqstanǵa eksporttaıdy.
BENT pen «Otbasy bank» memorýndýmǵa qol qoıdy. Taraptardyń kelisimi sheńberinde BENT 8 jumysshysyna 24 mln teńgeniń sertıfıkatyn «Naýryz jumysker» jańa baǵdarlamasy boıynsha qaıtarymsyz alǵashqy jarna retinde usyndy. Qarjynyń qalǵan bóligin «Otbasy bank» áleýmettik osal toptar úshin jyldyq 7% (JTSM 7,1%-dan 9,6%-ǵa deıin) jáne barlyq basqa sanattar úshin jyldyq 9%-ben (JTSM 9,4%-dan 13%-ǵa deıin) qarjylandyrady. «Otbasy bank» AQ basqarma tóraǵasynyń orynbasary Nurlan Aqshanov BENT-tiń memlekettik baǵdarlamany is júzinde qoldap otyrǵan eń alǵashqy kompanııa ekenin aıtty.
«Biz 17 naýryzdan bastap osy baǵdarlamany iske qosamyz. Baǵdarlama túrli deńgeıdegi jumyskerlerge arnalǵan. Sharty óte jeńil. Bastapqy jarna – 10%, nesıe mólsherlemesi de tómen», deıdi Nurlan Aqshanov.
Onyń aıtýynsha, nesıe merzimi – 19 jyl. Segiz jyldan keıin paıyzdyq mólsherleme 3,5%-dan (JTSM 3,6%-dan 4,4%-ǵa deıin) bastap 5%-ǵa (JTSM 5,1%-dan 6,9%-ǵa deıin) deıin tómendeıdi. Baǵdarlamaǵa qatysý úshin bankke kelip, qujattardy toltyrsa boldy. Almaty, Astana, Shymkent qalalary úshin nesıeniń maksımaldy mólsheri – 36 mln teńge, basqa qalalarda – 30 mln teńge.
«Mono qalalar nemese qalanyń shet aımaǵy úshin ekinshi naryqtaǵy úılerdi satyp alýǵa múmkindik qarastyrylǵan. Bıylǵa bólingen 72 mlrd teńge 500-den asa ótinish ıesin qanaǵattandyrady», deıdi Nurlan Aqshanov.
BENT prezıdenti, Ile aýdandyq máslıhatynyń depýtaty Dinmuhamed Kýzıev jeńildikti nesıemen úı satyp alýǵa múmkindik beretin sertıfıkatqa ıe bolǵan 8 jumysshyny tańdaý qatań irikteý arqyly ótkenin aıtyp berdi.
«Qazaqstanda alǵash ret memlekettik baǵdarlamaǵa qoldaý bildirý – biz úshin maqtanysh. Alǵashqy kezeńde 8 jumysshy qatysady. Jyldyń ekinshi jartysynda baǵdarlama aıasyn ártaraptandyrýdy josparlap otyrmyz. Mundaı bastama jumysshylardy qoldap qana qoımaıdy, jastar arasynda jumysshy mártebesin de kóteredi. Jumysshy, tehnıkalyq baǵyttaǵy mamandarǵa oń kózqaras óndiristi damytady, ekonomıkany ártaraptandyrady. Men zaýyt basshysy retinde elimizdegi barlyq kásiporyndardy «Otbasy bankpen» birge bizdiń bastamamyzdy qoldaýǵa shaqyramyn», deıdi Dinmuhamed Kýzıev.
Biz is-shara basynda «juldyzdy segizdikten» oryn alǵandardyń alǵashqysymen tanysyp, áńgimelestik. «BENT» JShS-nyń tehnıkalyq mamany Arman Jaqypbekovtiń osynda jumys istegenine bıyl 20 jyl.
«Bul men úshin juldyzdy sát boldy. Memleket basshysy 2025 jyldy «Jumysshy mamandyqtary jyly» dep jarııalady. «Otbasy banktiń» osy baǵyttaǵy baǵdarlamasyna bólingen sertıfıkat maǵan buıyrypty. Bul úshin bank basshylaryna, «BENT» JShS basshylaryna alǵys aıtamyn», deıdi ol.
5 balanyń ákesi Arman Jaqypbekovtiń sózinshe, úıdegi kishkentaılarynyń qýanyshynda shek joq. Olar eń birinshi Almaty tárizdi ásem qaladan ózderine úı buıyrǵanyna shyn qýanyshty. Sebebi osyǵan deıin otbasy biraz ýaqyt boıy 5 balamen jaldamaly páterde turǵan. Búginde Arman páterine kerek-jaraǵyn túgeldeýge kirisip ketipti.
Ekinshi keıipkerimiz Tımýr Sanýrov zaýytqa joǵary oqý ornyn bitire salyp, birden kelgen eken. Az ǵana jyl ishinde óz salasynyń qyr-syryn zerdelep úlgeripti.
«Qazir meniń qurdastarymnyń biri – bazarda, ekinshisi – kýrer bolyp júr. Sóz reti kelip turǵanda zaýyt, kásiporyndarǵa baryp, tehnıkalyq mamandyqtyń qyr-syryn meńgerińder degim keledi. Bul rette eń bastysy tózim kerek. Taza eńbegimniń arqasynda elenip, jumys berýshiler tarapynan qoldaý taptym. Bul men sııaqty jas mamandar úshin úlken múmkindik», deıdi ol.
«Naýryz jumysker» baǵytyna ótinishterdi qabyldaý 17 naýryzdan bastaldy. Baǵdarlama aıasynda 2 440-qa jýyq jumysshy kásipteriniń ókilderin qoljetimdi zaemdarmen qamtamasyz etý josparlanyp otyr.