Mádenıet jáne aqparat mınıstriniń orynbasary Evgenıı Kochetov Úkimet otyrysynan keıin ótken baspasóz máslıhatynda «Qazaqanımasııa» shyǵarmashylyq birlestigin Astanaǵa kóshirýdiń mańyzdylyǵyn atap ótti, dep habarlaıdy Egemen.kz.
Ol Almatydaǵy birqatar anımatorlar «Qazaqanımasııa» shyǵarmashylyq birlestigin Astanaǵa kóshirýge qarsylyq bildirip jatqanyn, onyń ústine anımasııany damytýǵa arnalǵan strategııanyń áli tolyq ázirlep bitpegenin aıtty.
«Biz qazir anımasııany damytýdyń aldaǵy 5 jylǵa arnalǵan keshendi josparyn ázirlep jatyrmyz. Ol josparda qarjylandyrý tetikteri de qarastyrylǵan. «Qazaqanımasııa» shyǵarmashylyq birlestigin Astanaǵa kóshirý týraly paıymdar da bar. Ondaı paıymǵa ne negiz bolyp otyr?
Birinshiden, bul jerde Astana hub ortalyǵy ornalasqan. Anımasııalyq qyzmet IT-ındýstrııanyń da bir bólshegi bolyp esepteledi. Astana hub-taǵy ımpýls anımasııanyń damýyna da serpin beredi degen úmit bar.
Ekinshiden, bul jerde jyl saıyn Comic Con festıvali ótedi. Bul jalpy tutas anımasııa salasyna arnalǵan, búkil TMD aýmaǵyndaǵy eń negizgi sharaǵa aınalyp úlgerdi.
Úshinshiden, kreatıvti ındýstrııany qoldaýǵa arnalǵan mamandandyrylǵan qordyń qurylatynyn aıttym. Osy sebepterdi negizinde birlestikti Astanaǵa kóshirý týraly paıymǵa kelip otyrmyz deýge bolady», dedi Evgenıı Kochetov.
Vıse-mınıstrdiń aıtýynsha, jospar bar bolǵanymen naqty sheshim áli qabyldanbaǵan.
«Anımasııany damytýdyń strategııasyn daıyndap bolǵan kezde sheshim belgili bolady. Qazirgi paıymymyz osyndaı. Menińshe, bul «Qazaqanımasııany» ári qaraı damytý turǵysynan barynsha qısynǵa keletin joba sııaqty. Biz anımatorlardyń bárimen baılanystamyz, olardyń ýájderimen de tanyspyz. Másele áli talqylaý prosesinde. Anımatorlarmen bir-eki ret kezdestik te. Báriniń pikiri eskeriledi. Onsyz eshkim sheshim qabyldamaıdy», dep sendirdi Evgenıı Kochetov.