18-21 naýryz aralyǵynda Shveısarııanyń Engadın shaharynda frıstaıl-mogýldan álem chempıonatynyń jalaýy jelbireıdi. Alpi taýy etegindegi jarysta elimizdiń namysyn Iýlııa Galysheva, Anastasııa Gorodko, Iýlııa Feklıstova, Pavel Kolmakov, Anton Bondarev, Fedor Býgakov, Maksım Emelıanov syndy sportshylar qorǵaıdy.
Tennısten komandalyq álem chempıonatynyń irikteý kezeńinde D tobynda óner kórsetetin elimizdiń áıelder quramasy Aýstralııa, Kolýmbııa komandalarymen kúsh synasady. 10-11 sáýirde Aýstralııanyń Brısbeninde ótetin jarysta Elena Rybakına, Iýlııa Pýtınseva, Zarına Dııas, Anna Danılına, Jibek Qulambaeva syndy oıynshylarǵa senim artylyp otyr.
Qurlyqtyq hokkeı lıgasynyń (QHL) pleı-offynda oınaıtyn komandalar tolyqtaı anyqtaldy. Batys konferensııasynan «Lokomotıv» (Iаroslavl), «Dınamo» (Máskeý), «Spartak» (Máskeý), SSKA (Máskeý), «Dınamo» (Mınsk), «Severstal» (Cherepoves), SKA (Sankt-Peterbýrg), «Torpedo» (Tómengi Novgorod) sondaı múmkindikke ıe bolsa, Shyǵys konferensııasynda «Traktor» (Chelıabınsk), «Salavat Iýlaev» (Ýfa), «Avtomobılıst» (Ekaterınbýrg), «Metallýrg» (Magnıtogorsk), «Aq Bars» (Qazan), «Avangard» (Omby), «Admıral» (Vladıvostok), «Sıbır» (Novosıbırsk) klýbtarynyń asyǵy alshysynan tústi. О́kinishke qaraı, Gagarın kýbogi úshin talasatyndar qataryna Astananyń «Barysy» qosyla almady.
Skı-alpınızmnen elimizdiń quramasy Ońtústik Koreıanyń Phenchhanynda ótken Azııa kýboginde jeti júlde oljalady. Tik kóterilý jarysynda Ásem Nazyrova men Shyńǵys Baıqashev jeńimpaz atandy. Nııaz Januzaqov kúmis alsa, Denıs Vlasov qolany qorjynǵa saldy. Sprıntte Denıs Vlasov pen Ásem Nazyrova aldyna jan salmady. Nııaz Januzaqov ekinshi oryndy enshiledi.
Maıamıde ótip jatqan ATR týrnıriniń irikteý synynyń jartylaı fınalynda Mıhaıl Kýkýshkın aýstralııalyq Adam Ýoltonǵa 1:6, 4:6 esebimen ese jiberdi. Aleksandr Shevchenko Lýkash Kleındi qapy qaldyrdy – 6:3, 7:6. Endi ol argentınalyq Tıago Agýstın Tırantemen kezdesedi. Aleksandr Býblık jarystyń negizgi bóliginiń alǵashqy aınalymynda Argentınanyń taǵy bir ókili Sebastıan Baespen saıysqa túsedi.