Byltyr sý tasqyny Atyraý halqyn biraz ábigerge salǵan. Kóktem shyǵyp, kún jylyna bastaǵany sol-aq eken, jergilikti jurt bıyl taǵy beımaza kúıge tústi. О́ıtkeni Atyraý oblysynyń Jem, Qıǵash ózenderinde sý tasqyny qaýpi joǵary ekeni anyqtalyp otyr. О́ńir basshylyǵy atalǵan sý aıdyndarynyń mańynda ornalasqan eldi mekenderdi qorǵaýdyń qamyna kirisip ketti.
Oblys ákimi Serik Shápkenovtiń aıtýynsha, aldyna ala baǵalaýǵa sáıkes byltyrǵy tasqyn qaýpiniń qaıtalanýyn joqqa shyǵarýǵa bolmaıdy. Sol sebepti buǵan deıin soǵylǵan bógetter rekonstrýksııalanyp, qalypqa keltirilip jatyr. Oǵan qajetti qarjy qarastyrylǵan. Materıaldyq-tehnıkalyq rezervter tolyq jınaqtalǵan.
«Dál qazir Jaıyq ózeninen qaýip tónip turǵan joq. Degenmen, Reseı Federasııasynyń Orynbor oblysyndaǵy áriptestermen baılanys jasap otyrmyz. Jaıyq ózeniniń jaǵalaýynda bóget soǵylyp, bekitildi», deıdi S.Shápkenov.
Ákimniń pikirinshe, óńirdegi ár aýdanǵa jaýapty adam bekitilip, ýchaskelerge negizgi kúshtik qurylymdar bólinedi. Kórshiles Aqtóbe, Reseıdiń Orynbor oblystaryndaǵy tıisti qurylymdarmen udaıy baılanys ornatylyp sý tasqynynyń qaýpi jónindegi derekter kún saıyn jańartylady.
«Sý tasqyny qaýpi tónýi yqtımal eldi mekenderdiń tizbesi qaıta naqtylandy. Baqylaýǵa alynǵan 51 eldi mekenniń 14-inde tasqyn qaýpi azaıdy. Alaıda 37 eldi mekende áli de qaýip bar. Qyzylqoǵa aýdanynyń 9 aýyldyq okrýgi men 5 eldi mekeninde jalpy uzyndyǵy 41,2 shaqyrym bóget salyndy. Jylyoı aýdanynda sý arnalarynyń 95,3 shaqyrym túbi tereńdetildi. Onyń ishinde 47,2 shaqyrymy Qursaı kanalynda, 48,1 shaqyrymy Jem ózeninde tazalandy. Jaǵalaýǵa 65,3 shaqyrym bóget turǵyzyldy», dep málimdedi oblys ákimi.
Tasqyn sýdan bolýy múmkin zalaldy joıýǵa 1 511 adam, 244 tehnıka, 187 motopompa, 20 júzý quraly, 3 tikushaq ázir tur. Sondaı-aq 48,5 tonna janar-jaǵarmaı, 235 tonna ınertti materıal, 866 myńnan astam qapshyq, 69 dana shatyr, 5 myńnan astam tósek jabdyǵy daıyndalǵan. Turǵyndardyń qaýipsizdigi úshin 200 evakýasııalyq beket ázirlendi.
Qyzylqoǵa aýdanynda úsh ózennen tasqyn qaýpi tóný múmkin ekeni anyqtalyp otyr. Olar – Oıyl, Noǵaıty, Saǵyz. Keıingi ekeýi shaǵyn sý arnasy bolǵanymen, eldi mekenderge tónetin qaýip az emes. Buǵan Aqtóbe oblysyndaǵy Ashy Oıyl ózeniniń arnasynan asýy, mol qardyń kúrt erýi áser etedi.
«Sý tasqynynyń aldyn alýda «Qazgıdromet» RMK Atyraý oblystyq fılıalynyń boljamyna taldaý jasalyp otyr. Boljamǵa sáıkes aýanyń temperatýrasy kúrt joǵarylasa, ózenderde sý deńgeıi kóterilip, jaıylmaǵa taralý qaýpi bar», deıdi aýdandyq tótenshe jaǵdaılar bóliminiń bastyǵy Baqtybek Tólegenov.
Aýdan ákimi Qanat Ázmuhanovtyń málimetinshe, «Qarasý» ózegi boıyndaǵy aýyzsý uńǵymalary qorshalyp, bóget turǵyzylyp jatyr. Qazir aýdanda 6 qaıyq, 66 motopompa, 60 myń qapshyq, kúrek, sýǵa ótkizbeıtin aıaqkıim sekildi qajetti quraldar jıyntyǵy bar. Atyraý qalasynda qosymsha 10 qaıyq rezervte tur. Turǵyndardy ornalastyratyn 24 evakýasııalyq beket daıyn.
Atyraý oblysy