ORAL. 10 aqpan. Reseı janarmaı ónimderin shyǵarý jóninen TMD elderi arasynda aldyńǵy lekte keledi. Bul turǵyda qazaqstandyq «Kondensat» kompanııalar toby kórshi memleket óndirisshilerimen básekelestikke ázir, dep habarlady egemen.kz tilshisi.
Mundaı túıin jasaýǵa atalǵan otandyq kompanııada sapasy óte joǵary, ekologııalyq turǵyda taza ónim qataryna kiretin Eýro-5 janarmaımyn óndirýge arnalǵan shaǵyn keshen qurylysynyń aıaqtalyp kele jatqany sebebshi bolyp otyr.
«Kondensat» kompanııalar toby dırektorlar keńesiniń tóraǵasy Valerıı Júnisovtiń málimdeýine qaraǵanda, ázirge elimizde esh balamasy joq aıryqsha jobany eki kezeń boıynsha iske asyrý kózdelgen. Soǵan saı birinshi kezeńde jylyna 200 myń tonna básekelestikke qabiletti joǵary ónim óndirilmek. Al ekinshi kezeń aıasynda ekologııalyq turǵydan taza jaǵarmaı shyǵarylmaq. Onyń quny 200 mln. AQSh dollaryna teń. Bul joba ótken jyly ındýstrııalandyrý kartasyna engizilgen.
Osyndaı tásilmen «Qarashyǵanaq» ken ornynda shıkizatty tereń túrde óńdeý óndirisi jolǵa qoıylmaq. Sonymen birge, ony taıaý jáne alys shetelder naryǵyna shyǵarý máseleleri de oılastyrylǵan. Mine, osylaısha oktandy, etılsiz Ka 5 benzınin tutynýshylarǵa usyna alatyn otandyq zaýyt bıylǵy jydyń úshinshi toqsanynda iske qosylady dep kútilýde. Eń bastysy Oral óńirinde shyǵarylatyn munaı ónimderi halyqaralyq sapa standarttaryna saı bolmaq.
Temir Qusaıyn.
Derek: egemen.kz.
Sýret: kursiv.kz.