Keshe Almaty naǵyz kóktem merekesiniń ortalyǵyna aınaldy dese bolǵandaı. Kóktemniń shýaǵyna oranǵan qala Naýryz meıramyn erekshe sán-saltanatpen toılady. Merekelik alańdar megapolıstiń túkpir-túkpirinde qylań uryp jatty. Qalany shattyq qushaǵyna bólegendeı. Dástúr boıynsha basty konsert Astana alańynda ótti. Tańsáriden beri munda merekelik kóńil kúı ornap, yntymaq pen birliktiń kórinisi atoı saldy.
Almaty ákimi Erbolat Dosaev saltanatty is-sharada jańarý, tatýlyq pen berekeniń bastaýy – Naýryz meıramynyń mańyzyn atap ótti. Halqymyzdyń dástúrli qazynasy – salt-dástúriniń san ǵasyrlar boıy jasasyp, urpaqtan urpaqqa jalǵasyp kele jatqanyn atap ótti. Saltanatty is-sharaǵa Qazaqstannyń Eńbek Eri, halyq ártisi Asanáli Áshimov, Halyq qaharmany Sát Toqpaqbaev, Qazaqstannyń Eńbek Eri Aıagúl Mırazova, Jazýshylar odaǵynyń tóraǵasy Mereke Qulkenov, basqa da zııaly qaýym ókilderi qatysyp, kóktem merekesine oraı quttyqtaýlaryn arnady.
«Almaty – Naýryz qushaǵynda» konserti merekelik is-sharanyń sánin asha tústi. «Dos-Muqasan» ansambli, «Sazgen sazy» folklorlyq-etnografııalyq ansambli, Maıra Muhamedqyzy, Janar Aıjanova, О́mirqul Aınııazov, taǵy da basqa tanymal ánshiler óner kórsetti.
Respýblıka saraıynyń aldynda erekshe bezendirilgen kıiz úıler tigildi. «Rýhanı mura» kıiz úıinde Abaı, Jambyl jáne Dına oınaǵan mýzykalyq aspaptardyń kóshirmesi qoıylyp, konsert ótti. «Almatyǵa saıahat» kıiz úıinde qonaqtar qalanyń kórikti jerlerin vırtýaldy formatta tamashalaı aldy. Sondaı-aq sheber Marat Beksultanovtyń qolynan shyqqan nebári 20 mınýt ishinde qurastyrýǵa bolatyn «Innovasııalyq kıiz úı» ornatyldy.
Abaı alańynda altybaqan ornatylyp, ulttyq oıyndar men túrli jarystar qyzdy. Sondaı-aq Abaı Qunanbaıulynyń 180 jyldyǵyna arnalǵan art-nysandar da boı kóterdi. 21-22 naýryz kúnderi keshki ýaqytta alańda belgili ánshiler konsert qoıdy.
Festıval aıasynda birneshe kún boıy aýqymdy qolóner jármeńkesi jumys isteıdi. Qonaqtar aǵash oıý, zergerlik buıym jasaý, bylǵary óńdeý jáne kıiz basý ónerin tamashalaı alady. Kıiz úılerde sheberlik dáristeri uıymdastyrylyp, qonaqtar toqyma toqý, ulttyq oıý-órnekpen áshekeı buıym daıyndaý jáne qazaqtyń dástúrli mýzykalyq aspaptaryn jasaý ónerin úırene alady.
Ońtústik astana bul kúnderi mereke qushaǵynda. Qala qonaqtary áýejaıdan merekeniń saltanatyn sezinip, qurmetke bólenip jatsa, mádenı ortalyqtar, jolaýshy tasymaly beketterinde túrli kórmeler ótip, saýda oryndarynda qyzyldy-jasyldy jármeńke qyzyp jatyr.
Qalada merekelik is-sharalar 23 naýryzǵa deıin jalǵasady. Kún saıyn qonaqtar men turǵyndary «Juldyzdy Almaty» festıvali aıasynda konsertterdi, teatr qoıylymdaryn, ulttyq oıyndardy, túrli performanstar men qolóner jármeńkelerin tamashalaı alady.
ALMATY