Túrkistan oblysynda «Taza Qazaqstan» baǵdarlamasy aıasynda 7 263 tazalyq is-sharasy josparlanǵan. Onyń ishinde kóktemgi aǵash egý, kógaldandyrý, tazalaý jumysy qarqyndy júrgizilip jatyr. Naqtylaı aıtsaq, qala men aýyl kóshelerin tazalaýǵa 739 arnaıy tehnıka jumyldyrylyp, 129 672 turǵyn belsendilik tanytty. Nátıjesinde, 201 375 kóshet otyrǵyzylyp, 2 709 tonna qoqys shyǵaryldy.
Jalpy, óńirde bıyl 1,2 mln aǵash otyrǵyzý, onyń ishinde 631 túp aǵashty kóktem mezgilinde otyrǵyzý josparlanǵan. Aqpannyń aıaǵynda bastalǵan jumys nátıjesinde otyrǵyzylǵan 200 myńnan astam aǵash sý júıesimen qamtamasyz etilip, qorshaý jasaldy.
Oblys ákimi Nuralhan Kósherovtiń tóraǵalyǵymen ótken apparat májilisinde «TazaQazBot» aqparattyq júıesine túsken 1 527 ótinimniń 1 505-i oryndalǵany málim etildi. Bıyl qoǵamdyq oryndarda sanıtarlyq talaptardy saqtamaǵandarǵa 4 487 hattama toltyrylǵan. Barlyq aýdan, qala ákimdikteri, memlekettik kommýnaldyq kásiporyndardyń tıisti qujattaryna qatty turmystyq qaldyqtardy jınaý, shyǵarý máselesi jóninde tolyqtaı ózgerister engizilgen. Naýryz aıynda ótkiziletin merekelik baǵdarlamalarda tazalyqqa, kógaldandyrý jumysyna da erekshe mán beriledi. Mysaly, Saıram aýdanynda «Jasyl jelek» is-sharasynda 12 myńnan asa aǵash kósheti otyrǵyzyldy. Oblystyq tabıǵı resýrstar jáne tabıǵat paıdalanýdy retteý basqarmasy Saıram aýdany boıynsha bekitken, 2023–2025 jyldarǵa arnalǵan eldi mekenderdi kógaldandyrýdyń is-shara josparyna sáıkes, bıyl kóktemde 23 300 túp kóshet otyrǵyzý josparlanǵan.
Oblysta bıylǵy josparǵa sáıkes, eldi mekenderge 1 mln-nan astam kóshet úlestirý kózdelgen. Búginde 206 375 túp kóshet aýdan-qala ákimdikterine jóneltilgen. Tabıǵı resýrstar jáne tabıǵat paıdalanýdy retteý basqarmasynyń basshysy Qaırat Ábdýalıevtiń málimdeýinshe, óńirde 3 mln 472 myń gektardy quraıtyn memlekettik orman qory bar.
«Memleket basshysynyń «Jańa jaǵdaıdaǵy Qazaqstan: is-qımyl kezeńi» atty Joldaýynda respýblıka kóleminde 2 mlrd aǵash otyrǵyzýdy tapsyrǵan bolatyn. Tapsyrmaǵa sáıkes, oblystyń orman qory jerlerine 2021–2027 jyldary 110 myń gektarǵa 170 mln kóshet egý jumysyna qatysty arnaıy keshendi jospar bekitilgen. Sol josparǵa sáıkes, 2021–2024 jyldar aralyǵynda 79 myń gektar jerge 117 mln túp kóshet egildi. 2025–2027 jyldary aralyǵynda qalǵan 31 myń gektar jerge 53 mln túp kóshet egý jumysy tolyǵymen júrgiziledi. О́tken jyly orman sharýashylyǵy mekemelerinde jalpy kólemi 343 gektardy quraıtyn 24 orman tuqymbaǵynda 30 mln-ǵa jýyq kóshet ósirilip, 10 mln-nan astam kóshet egildi», dedi basqarma basshysy.
«Otyrar orman jáne janýarlar álemin qorǵaý jónindegi memlekettik mekemesindegi» tuqymbaqta ósirilgen kóshetter Túrkistan, Arys qalalary men Otyrar aýdandaryn kóshetpen qamtyp otyr. On gektar alqapty alyp jatqan Qoǵam aýylyndaǵy turaqty tuqymbaqta qaraǵash, órik, úıeńki, shaǵan, jıde, qylqan japyraqty taǵy basqa aǵash túrleri ósiriledi. Tuqymbaqty damytý maqsatynda bıyl gúldi, sırek kezdesetin sándik aǵashtardy ósirý kózdelip otyr. Mekeme tuqymbaǵynan aýdan, qala eldi mekenderin kógaldandyrý jumystaryna ótken jyldyń kúz mezgilinde 117 820 túp aǵash-buta kósheti bosatyldy. Sondaı-aq tuqymbaqta tazalyq sharalary qarqyndy júrgizilip keledi. «Taza Qazaqstan» baǵdarlamasy aıasynda senbilikter uıymdastyrylyp, ormanshylar tuqymbaq aýmaǵynda retsiz ósken shópterdi julyp, qýraǵan taldardy butalap, aǵash túpterin áktep jatyr. Jalpy, jyl saıyn ormanshylar tuqymbaqty tazalap, jasyl jelekterdi kóktem-kúz aılarynda bosatýǵa daıyndaıdy.
Túrkistan oblysy