2025 jyldyń basynan beri Batys Qazaqstan oblysynyń Bókeı ordasy, Tasqala jáne Jánibek aýdandarynda birneshe ret ushqyshsyz ushatyn apparat tabyldy. Bul aýdandardyń bári de Reseı Federasııasymen shekaralas ornalasqan.
Bıylǵy 18 aqpanda Bókeı ordasy aýdanyna qarasty Uıaly aýyly mańynda ushqyshsyz ushatyn apparatqa uqsas qurylǵy qulaǵan bolatyn.
Odan keıin 18 naýryzda Tasqala aýdanynyń Qazaqstan aýyldyq okrýginde, Atameken aýylynan 18 shaqyrym jerden uzyndyǵy 3 metr shamasynda taǵy bir apparat tabyldy. Nysandy alǵash kórgen turǵyndar túsirgen beınejazbada apparattyń jer syzyp kelip toqtaǵan izi baıqalady.
24 naýryz kúni Jánibek aýdany Uzynkól aýyldyq okrýgi aýmaǵynda taǵy da osyndaı oqıǵa boldy. Eldi mekennen shamamen 8 shaqyrym qashyqtyqta belgisiz apparattyń bólshekterin aýyl turǵyny kórip, tıisti mekemelerge habarlaǵan.
26 naýryz kúni Jánibek aýdany ortalyǵynan 55 shaqyrym qashyqtyqta Qamysty aýyly aýmaǵynan taǵy bir apparattyń bólshekteri tabylǵany jóninde habarlama tústi.
Osy jaǵdaıdyń bárinde de aýdandyq prokýratýra, aýdandyq polısııa bóliminiń jedel toby, tótenshe jaǵdaılar bólimi, jergilikti atqarýshy bılik jáne aýdandyq shekara basqarmasynyń ókilderi oqıǵa ornyna baryp, qulaǵan apparattardy alyp ketken. «Oqıǵanyń mán-jaıy tekserilip jatyr» degenmen, halyqqa áli naqty aqparat berilgen joq.
Búgin, 26 naýryz kúni Astanada Májilis otyrysyna kelgen Syrtqy ister mınıstriniń orynbasary Álibek Qýantyrov jýrnalıster saýalyna «BQO aýmaǵyndaǵy jaǵdaıǵa qatysty tergeý júrgizilip jatyr. Tehnıkalyq máseleler qaralyp jatyr, ıaǵnı apparat qaıdan ushty, qaıda qulady jáne kimge tıesili. Quzyrly organdar men tehnıkalyq mamandar zerttep, anyqtaıdy. Keıin belgili bolady», dep jaýap bergen.
Al Qazaqparat agenttigi QR Qorǵanys mınıstriniń orynbasary Shaıh-Hasan Jazyqbaevtyń «BQO-daǵy ushqyshsyz ushatyn apparattyń qulaý faktisi boıynsha quzyretti organdar tergeý júrgizip jatyr. Tergeýden Qorǵanys mınıstrligi de tys qalǵan joq. Áýe qorǵanysy árqashan bizdiń qaraýymyzda. Tergeýdiń qorytyndysy boıynsha qajet bolsa, qosymsha is-shara qabyldaımyz. Múmkin tehnıkalyq aqaý bolyp, syrtqa shyǵyp ketken shyǵar, basqa da sebep bolýy múmkin. Tergeý aıaqtalǵansha, naqty aıta almaımyz», degen jaýabyn taratty.
Mınıstrdiń orynbasary halyqty alańdamaýǵa shaqyryp, jaǵdaıdyń baqylaýda ekenin aıtqan.
Batys Qazaqstan oblysy