Amal merekesimen bastalǵan áz-Naýryz merekesi Taraz qalasyndaǵy ortalyq alańda túıindeldi. Jańarý men jańǵyrýdyń bastaýy bolǵan jyl basy «Qus qanatyndaǵy Naýryz» atty merekelik konsertke ulasty. Kópshilik nazaryna ulttyq qundylyqtardy ulyqtaıtyn, salt-dástúrdi dáripteıtin teatrlandyrylǵan qoıylym usynyldy.
Bul kúni áýlıeatalyq áleýmet esimi elge belgili ánshilerdiń ádemi ánderin tyńdap, kúmbirlegen kúı sarynyna qulaq túrdi. Qaırat Rysqulbekov atyndaǵy saıabaqqa tigilgen aqshańqan kúıiz úılerdiń mańy dýmanǵa bólendi. Ulttyq kıim kıgen qyz-jigitter altybaqan teýip, máre-sáre boldy. Sondaı-aq ulttyq sport túrlerinen uıymdastyrylǵan tartysty jarystar da merekege sán berdi.
«Kóktemniń shýaqty meıramy bıyl qasıetti Ramazan aıymen tuspa-tus kelip otyr. Áz-Naýryz – jańarý men jańǵyrýdyń, bereke men birliktiń bastaýy. Kún men tún teńesetin osynaý merekeniń qazaq halqy úshin qaı kezde de orny bólek.
Memleket basshysy Qasym-Jomart Toqaev jýyrda ótken Ulttyq quryltaıda Naýryz merekesiniń mártebesin kóterip, mazmunyn baıytýdyń mańyzy zor ekenin atap ótkeni belgili. Al ótken jyly Prezıdenttiń bastamasymen jyl basyn toılaýdyń jańa tujyrymdamasy engizildi. Naýryznamanyń onkúndigi bıyl da laıyqty jalǵasyn tapty. Oǵan óńirimizdiń barlyq aýdandary men aýyldary atsalysty.
Ulttyq salt-dástúrimiz ben qundylyqtardy dáripteý – barshamyzdyń ortaq mindetimiz. Áz-Naýryz qutty bolsyn! Árbir otbasynda shattyq, qýanysh bolsyn», dedi oblys ákimi Erbol Qarashókeev óńir halqyn quttyqtap.
Bul kúni áz-Naýryz meıramy óńirdiń barlyq aýdany men aýylynda sán-saltanatymen jalǵasty. Ulttyq salt-dástúr jańǵyrǵan merekede aqyndar aıtysy ótkizilip, qazaq kúresi sekildi ulttyq sport túrlerinen jarystar uıymdastyryldy.
Jambyl oblysy