Vıse-premer jumys sapary barysynda Jylyoı aýdany men Qulsary qalasynyń sý tasqynyna daıyndyǵyn tekserdi, dep habarlaıdy Egemen.kz.
Jylyoı aýdany qaýipti aımaqta ornalasqan jáne jyl saıyn kóktemde sý tasqynyna ushyraıdy. Sý tasqyny qaýpiniń negizgi sebebi – uzyndyǵy 212 shaqyrymǵa sozylǵan Jem ózeni. О́zen jaǵalaýy men Qulsary qalasy arasynda jalpy uzyndyǵy 65 shaqyrym qorǵanys bógetteri salynyp jatyr. Qurylys jumystaryna 136 arnaıy tehnıka jumyldyrylǵan. Qazirgi tańda sý negizinen tereńdetilgen Jem ózeni arqyly ótip jatyr. Qulsary qalasynda kúndelikti baqylaý júrgizilip otyr. Atyraý oblysynyń ákimi Serik Shápkenov aǵymdaǵy jaǵdaı týraly baıandap, qalada ahýal turaqty ekenin málimdedi.
Qulsarydan bólek, sý basý qaýpi bar aımaqqa eki aýyldyq okrýg: Jem jáne Qaraarna kiredi. Qanat Bozymbaev Turǵyzba jáne Shoqpartoǵaı aýyldaryndaǵy jaǵalaýdy bekitý jumystarymen tanysyp, Jem ózeniniń jaǵalaýy men Qursaı kanalyn nyǵaıtý jumystary júrip jatqan aýmaqty aralady. Sondaı-aq jalpy uzyndyǵy 95 shaqyrymdy (Jem – 48,9 km, Kúrsaı – 46,1 km) qamtıtyn túbin tereńdetý jumystary júrgizilýde. Qazirgi ýaqytta Jem ózeniniń túbin tereńdetý tolyq aıaqtaldy.
Jylyoı aýdanynda barlyǵy 255 arnaıy tehnıka jumyldyrylǵan. Bógetterde jaǵdaıdy táýlik boıy baqylaý úshin kezekshilik beketteri uıymdastyryldy. Sonymen qatar aýdanǵa Mańǵystaý oblystyq TJD-dan, Qorǵanys mınıstrliginiń Atyraý jáne Aqtóbe oblystaryndaǵy áskerı bólimderi jáne Atyraý oblystyq polısııa departamentinen qosymsha kúshter men tehnıka jiberildi.
Qanat Bozymbaev Aqtóbe oblysy Baıǵanın aýdanynyń Mııaly aýyly men Oıyl aýdanyndaǵy jaǵdaımen de tanysty. Munda erekshe baqylaýda turǵan Oıyl ózeninde tazalaý jáne tereńdetý jumystary jalǵasyp jatyr.
Vıse-premer Atyraý oblysy, Qyzylqoǵa aýdanynyń Mııaly aýylyna baryp, Saǵyz aýylyndaǵy jaǵalaýdy bekitý jumystaryn baqylady. Qyzylqoǵa aýdany arqyly Noǵaıty, Oıyl jáne Saǵyz ózenderi ótedi, olar kóktemgi sý tasqyny kezinde úlken qaýip tóndiredi. Qorǵanys sharalary aıasynda 54 shaqyrym bóget nyǵaıtylyp, 8 shaqyrym ózen arnalary tazartylyp, tereńdetildi.
Oblys ákimdigine aımaqtaǵy tótenshe jaǵdaıdyń aldyn alý jáne joıý boıynsha barlyq josparlanǵan sharany aıaqtaý, sý tasqyny qaýpi tolyq joıylǵansha, táýlik boıy jumys isteýdi jalǵastyrý jáne turǵyndardy kún saıyn aǵymdaǵy jaǵdaıdan habardar etip otyrý tapsyryldy.