Kúntizbede kóktem bolǵanymen, Altaıdyń eli bórikterin áli sheshe qoıǵan joq. Taýly aýdandardaǵy qardyń kóbesi de sógilmegen. Siresken kúıi jatyr. Ony aıtyp otyrǵanym, Buqtyrma sýqoımasynda muz oıyp, balyq aýlaýdan saıys ótti desem, bireý sener, bireý senbes. Iá, Samar aýdanynda ótken «Buqtyrma balyqshy – 2025» festıvalinde 450-den astam balyqshy baq synasty.
Bul kúni Kúrshim kópiriniń tusynda balyqshylar belgilengen jerge ornalasyp, qarmaq salýǵa kirisken. Qatysýshylardyń ishindegi eń kishisi 16 jasta bolsa, úlkeni seksenniń seńgirine taıaǵan edi. Olar balyqqa kiriskende, jaǵalaýǵa qaz-qatar tigilgen kıiz úılerdiń tusynda qazan kóterilip jatqan. Sahna tórinde elimizdiń estrada juldyzdary án salǵan, óner súıer el tamsanǵan. Sportshylar qoı kóterip, myqtylyqtaryn synasa, mergender sadaq atyp saıysty.
– Arnaıy osy festıval úshin Almatydan kelip turmyn. Nemerelerimdi erte keldim. Buǵan deıin Shyǵystyń jazyn ǵana kórgenmin. Endi, mine, qysyn da kórip jatyrmyn. Qysy da keremet eken. Konsert kórip, ıt jekken shanaǵa otyryp, máz boldyq, – deıdi festıval qonaǵy Gúljan Aqylbekqyzy.
It shana serýeninen bólek áýe sharlarymen ushýǵa da múmkindik jasalǵan. Bul ýaqytta balyqshylar oryndarynan tapjylmaı qarmaǵyn qabýdy tilegen. Olardyń ishinde áıelder de bar.
– Jetpisten astym. О́skemennen jarysqa qatysý úshin keldim. Balyq aýlaýmen zeınetke shyqqannan bastap aınalysyp kelemin. Qazir súıikti isim. Adam qartaıǵan shaǵynda aınalysatyn jumysy bolmasa, aýyryp-syrqaı beredi. Sol úshin ermegi bolýy kerek, – deıdi Vera Dmıtrıevna.
Eki saǵattan soń qazylar alqasy aýlanǵan balyqtardy nómirlep, salmaqtaryn ólshedi. Bul jarystyń bas júldesi de erekshe edi. Gran-prı – eki adamǵa arnalǵan Maldıv araldarynda balyq aýlaý týry. Qalǵan úsh orynǵa Alakólde balyq aýlaý baqyty buıyrǵan.
– Mundaı jarys elimizde birinshi ret ótkizilip tur. Festıvalǵa 450-den astam adam qatysty. Onyń ishinde bala da, áıelder de bar. Aýlanǵan balyqtardyń ishindegi eń úlkeni ári salmaqtysy 680 gramdyq Buqtyrma tabany boldy. Endi tek qysqy festıval ǵana emes, jazda da uıymdastyrýdy josparlap otyrmyz, – dedi ShQO sporttyq balyq aýlaý federasııasynyń prezıdenti Aleksandr Gýlıaev.
Shyǵys Qazaqstan oblysy,
Samar aýdany