Elimizde onkologııalyq aýrýlardyń aldyn alý maqsatynda tekseris sharalary júrip jatyr. Osyǵan oraı Densaýlyq saqtaý mınıstrligi onkoskrınıngten kimder tegin óte alatynyn aıtyp berdi, dep jazady Egemen.kz.
Tekseris pasıenttiń tirkelgen jeri boıynsha medısınalyq-sanıtarııalyq alǵashqy kómek uıymdarynda júrgiziledi. Medısınalyq-sanıtarııalyq alǵashqy kómek uıymdary pasıentke qońyraý salý, SMS joldaý arqyly habarlaıdy. Odan bólek mamandar úılerdi aralap, turǵyndardy aqparattandyrady.
– Sút bezi obyryn erte anyqtaý úshin: sút beziniń qaterli isikterimen dınamıkalyq baıqaýda turmaǵan 40, 42, 44, 46, 48, 50, 52, 54, 56, 58, 60, 62, 64, 66, 68, 70 jastaǵy áıelder; Jatyr moıny obyryn erte anyqtaý úshin: jatyr moınynyń qaterli isikterimen dınamıkalyq baqylaýda turmaǵan 30, 34, 38, 42, 46, 50, 54, 58, 62, 66, 70 jastaǵy áıelder;
Kolorektaldy obyrdy erte anyqtaý úshin: jýan ishektiń qatersiz jáne qaterli isikterimen dınamıkalyq baıqaýda turmaǵan 50, 52, 54, 56, 58, 60, 62, 64, 66, 68, 70 jastaǵy erler men áıelder óte alady, – deıdi mınıstrlik mamandary.
Mundaı tekserister joǵaryda atalǵan obyr túrlerimen dınamıkalyq baqylaýda turmaıtyn, mindetti áleýmettik medısınalyq saqtandyrý júıesinde saqtandyrylǵan azamattarǵa júrgiziledi.
– Skrınıng sheńberinde aýrýlardyń dıagnostıkasy dıagnozdy morfologııalyq verıfıkasııalaý deńgeıine deıin júrgiziledi, odan ári aýrýdyń taralý dárejesin anyqtaý úshin zerttep-qaraý talap etiledi. Obyr aldy prosester anyqtalǵan jaǵdaıda, pasıentter onkologtyń konsýltasııasynan óte alady. Qazirgi ýaqytta óńirlik onkologııalyq ortalyqtardyń bazasynda, saraptamalyq endoskopııalyq ortalyqtar qurylǵan. Olar kolorektaldy obyr skrınınginen ótetin pasıentter arasynda dıagnostıkalyq endoskopııalyq zertteýlerdi ǵana júzege asyryp qoımaı, saýyqtyrýdan ótedi jáne dınamıkalyq baqylaýǵa alynady, – deıdi Densaýlyq saqtaý mınıstrligi.
Mınıstrliktiń dereginshe, skrınıng ázirge MÁMS esebinen qarjylandyrylady. Onkologııalyq skrınıngti halyqqa tegin kórsetiletin medısınalyq qyzmetter tizimine engizýdi josparlanyp otyrǵandaryn habarlady. Zańnamalyq akt qabyldansa, atalǵan tekseris túrleri mindetti áleýmettik medısınalyq saqtandyrý júıesinde saqtandyrylmaǵan azamattarǵa da tegin júrgiziledi.