Elimizge resmı saparmen kelgen Slovenııa Prezıdenti Natasha Pırs-Mýsar Nazarbayev University stýdentterine dáris oqydy. «Jan-jaqtylyqtyń tómendeýi ańyz ba, álde shyndyq pa?» taqyrybyndaǵy dáriske 200-den asa stýdent, oqytýshy qatysty.
Mártebeli meımandy Sıfrlyq damý, ınnovasııalar jáne aeroǵarysh ónerkásibi mınıstri Jaslan Mádıev, NU vıse-prezıdentteri Kadısha Daıyrova men Ásel Ývalıeva, sondaı-aq vıse-prorektor Loretta O’Donnell qarsy alyp, ýnıversıtettiń tynys-tirshiligimen tanystyrdy. Dáris bastalǵanǵa deıin Slovenııa Prezıdenti ýnıversıtettiń qurmetti qonaqtaryna arnalǵan arnaıy kitapta jazba qaldyrdy.
Natasha Pırs-Mýsar óz sózinde bitimgershilik saıasat, sý resýrstary, adam quqyqtary men qorshaǵan ortany qorǵaý, jasandy ıntellekt jáne genderlik teńdik sııaqty mańyzdy jahandyq taqyryptardy qozǵady. Prezıdent genderlik ádilettiń erekshe mańyzyn atap ótip, atalǵan máselelerdiń barlyǵyn sheshý úshin halyqaralyq deńgeıde ujym retinde birigip kúsh-jiger jumsaý qajet ekenin aıtty.
– Genderlik teńdik pen genderlik ádilettiń arasyndaǵy aıyrmashylyq mynada: teńdik – barlyǵyna birdeı aıaqkıim berý, al ádildik – árkimge ózine saı keletin aıaqkıim berý. Sondyqtan genderlik ádilet kóptegen saıası qadamdy qajet etedi. Slovenııa áıelderdiń quqyqtaryn belsendi túrde qorǵaıdy, sondaı-aq olardyń kóshbasshylyq pozısııalarda bolýyn qoldaıdy. Men – Slovenııanyń alǵashqy áıel prezıdentimin, oǵan qosa Slovenııa Parlamentinde áıelderdiń úlesi – 36%. Bul kórsetkishter birtindep ósip keledi, alaıda áli de jumys kóp», dedi ol óz sózinde.
Sonymen qatar ol Qazaqstan men Slovenııa arasyndaǵy, ásirese jasandy ıntellekt jáne sý resýrstaryn basqarý salasyndaǵy yntymaqtastyqtyń áleýetine senim bildirdi.
«Qazaqstan men Slovenııa – múmkindikter kóp el. Bizdiń bıznes-qaýymdastyqtar bul sózderdi rastaıdy dep úmittenemin», dedi Natasha Pırs-Mýsar.
Dáristen keıin stýdentter Slovenııa Prezıdentine suraqtar qoıyp, halyqaralyq saıasat týraly derekterge qanyqty.