ASTANA. 11 aqpan. Reseıdiń ataqty jeńil atleti, eki Olımpııalyq oıyndardyń chempıony Elena Isınbaeva ýáde bergenindeı, birshama ýaqyt úzilisten keıin sportqa qaıtyp oraldy. Bul týraly «Argýmenty ı fakty» habarlady.
SSKA sport klýbynyń baspasóz qyzmeti málimdegendeı, syryqpen sekirýshi Elena Isınbaeva 12 aqpan kúni óziniń sportqa oralǵanyn resmı habarlaıdy da, SSKA jeńil atletteri komandasyna sportshy-nusqaýshy laýazymy boıynsha jumysqa qabyldanady. Qazir jasy 32-ge kelip otyrǵan atlettiń basty maqsaty 2016 jyly ótetin Rıo-de-Janeıro Olımpııalyq oıyndaryna qatysý bolyp otyrǵanyn da bilý qıyn emes. Ol Brazılııada úshinshi márte Olımpıada chempıony bolýdy armandaıdy.
Elena Isınbaeva osynyń aldynda sońǵy ret, 2013 jyly Máskeýde ótken álem chempıonatynda saıysqa túsken edi. Sonda 4 metr 89 santımetrdiń arǵy jaǵynan asyp ótken sportshy 15 mınýttan soń ótken baspasóz máslıhatynda óziniń kásibı mansabynda úzilis jasaǵaly turǵanyn, biraq mindetti túrde qaıta oralatynyn aıtqan. Al úzilisti otbasylyq isterge arnaıtynyn jetkizgen.
Elena Isınbaeva 1982 jylǵy 3 maýsymda Volgograd qalasynda týǵan. Syryqpen sekirýde álemniń 29 rekordyn jasaǵan. Ákesi Gadjı Gafanovıch, ulty tabasaran, anasy Natalıa Petrovna, ulty orys, ekeýi de qarapaıym kásiptiń adamdary bolǵan.
2014 jylǵy 28 shildede Elena qyz týdy. Sodan beri bala kútimimen otyrdy. Al sol jylǵy qazan aıynda Nıkıta esimdi orys jigitine kúıeýge shyqty.
Damır Qojamqul.