Márege on arý shyǵyp, mine-mine úzdigi anyqtalady degenshe kórermender men jankúıerler taǵat tappaǵan. Qala ákimdiginiń qoldaýymen ótip jatqan «О́skemen arýy-2025» baıqaýy eki aptaǵa sozylyp, 30 naýryz kúni qorytyndysy shyqty. Árıne, qazylar úshin aqylyna kórki saı arýdy anyqtaý ońaıǵa soqpaǵan.
Bul jolǵy jarystyń sharty men júıesi erekshe boldy. Jas shekteýi bolǵanymen, arýlardyń ultyna, násiline álbette qaramaǵan. Tipti aıaýly jar, asyl analar da qatysty. Tek qana jastary 21-35 jas aralyǵynda bolýy shart. Jeńimpazǵa 1 mln teńge aqshalaı syılyq pen sheberdiń qolynan shyqqan sándi sáýkele tigildi. Ol úshin synǵa túsken sulýlar san túrli kezeńnen ótti. Ártistik qabiletterin kórsetti, ulttyq qundylyqtardy qanshalyqty biletinderin baıqatty. Fotoǵa túsip, kamera aldynda ózderin ustaýdy da baǵalady. Súringenderi saıystyń shartyna sáıkes shyǵyp otyrdy. Áýelde 80 arý tizimdelgenimen, aqtyq saıysta on arý ǵana ortaǵa shyqqan. Bul kúni bári bar ónerlerin saldy. Án de aıtyldy, bı de bılendi. Talanttaryna tańǵalǵan qazylar upaılaryn arttyrdy. Aıta keterligi, saıystyń ádil ótýi úshin ár kezeń saıyn qazylar aýysyp otyrǵan. Al arýlar úlken jaýapkershilikpen, jeńiske degen umtylyspen qatysyp jatty.
– Qazaqtyń ónerin, ulttyq qundylyqtaryn, mádenıetin pash etýdi maqsat ettik. Arýlarymyz ulttyq qundylyqtardy dáripteýge tyrysty. Ondyqqa engen qyzdardyń toǵyzyna 100 myń teńgeniń sertıfıkaty jáne jeńimpazǵa 1 mln teńge syıaqy qarastyrylǵan, – dedi qalalyq mádenıet jáne tilderdi damytý bóliminiń bastyǵy Almaz Nurǵalıev.
Sóıtip, ónerler ortaǵa salynyp, kórermender qıqý qosyp bolǵan soń qazylar aqyldasýǵa ketken. Dál osy sátte ǵoı, arýlar da, olardy qoldap kelgen jankúıerler de taǵat tappaǵan. Júrgizýshiler ortaǵa shyǵyp, atalymǵa ıe bolǵandardy marapattap bolǵansha sulýlardyń jan-dúnıesi alaı-dúleı bolǵan shyǵar. Sebebi árkim ózine jeńis tiledi. Qysqasy, «О́skemen arýy-2025» baıqaýynyń jeńimpazy seksen qyzdyń arasynan sýyrylyp shyqqan sulý Zınaıda Bektemirova boldy. Halyq qoshemettedi, qıqý qosty, qol soqty. Byltyrǵy О́skemen arýy sheberdiń qolymen zerlengen sáýkeleni Zınaıdaǵa kıgizdi.
– Kútpegen jeńis boldy. Birge qatysqan arýlardyń barlyǵyna sáttilik tileımin, – dedi Zınaıda Bektemirova.
Aıta keteıik, Zınaıda Aqtóbe oblysynyń týmasy, Shyǵystyń kelini. Oblystyq drama jáne operetta teatrynda jumys isteıdi.
О́SKEMEN