Oral qalasyna Reseı Federasııasynyń Saratov oblysy Úkimeti tóraǵasynyń orynbasary Alekseı Nıkıtın bastaǵan delegasııa keldi. Meımandardy Batys Qazaqstan oblysynyń ákimi Narıman Tóreǵalıev qarsy alyp, ekijaqty yntymaqtastyqtyń keleshegin talqylady.
Saratov oblysy Batys Qazaqstan oblysynyń Jánibek, Qaztalov, Tasqala aýdandarymen shektesedi. Ejelden aýyly aralas, qoıy qoralas jatqan kórshilerdiń arasyndaǵy ekonomıkalyq qarym-qatynastyń tamyry tereńde jatyr. 2024 jyldyń qorytyndysy boıynsha Batys Qazaqstan oblysynyń Reseı Federasııasymen taýar aınalymy 700 mln dollardan asqan eken. Sonyń 37,1 mln dollary dál osy Saratov oblysyna tıesili. Sondaı-aq óńirde reseılik bıznespen áriptestik qarqyndy damyp keledi. Keıingi úsh jylda saýda, marketıngtik zertteýler, IT, basqa da salalarda 740-tan astam birlesken kásiporyn tirkelipti.
Oralǵa kelgen reseılik delegasııa quramynda memlekettik mekeme basshylary, saýda-ónerkásip palatasynyń músheleri, bilim berý salasynyń qyzmetkerleri men kásipkerler boldy. Kezdesý barysynda oblys ákimi Narıman Tóreǵalıev Memleket basshysy Qasym-Jomart Toqaevtyń eki eldiń óńirleri arasyndaǵy ózara tıimdi saýda-ekonomıkalyq baılanystyń mańyzdylyǵyna birneshe ret nazar aýdarǵanyn atap ótti.
О́ńir basshysy óz sózinde agroónerkásip kesheniniń jedel damyp kele jatqanyn, bıyldyń ózinde aýyl sharýashylyǵyn damytýǵa 114 mln AQSh dollary bólingenin aıtty. 2025 jyldyń alǵashqy eki aıynyń ishinde ǵana óńirdiń agrosalasyna 400 myń dollar kóleminde ınvestısııa tartylǵan.
«Batys Qazaqstan oblysy aýyl sharýashylyǵy men ǵylym salasynda reseılik áriptesterimen tyǵyz qarym-qatynas ornatqan. Máselen, Oral aýyl sharýashylyq tájirıbe stansasynyń ǵalymdary N.M.Týlaıkov atyndaǵy Samara aýylsharýashylyq ǵylymı-zertteý ınstıtýtymen, P.N.Konstantınov atyndaǵy «Edilboıy» seleksııalyq-tuqymdyq ǵylymı-zertteý ınstıtýtymen áriptestik baılanysta. Samaralyqtarmen birlese jasalǵan jazǵy bıdaıdyń «Ediljaıyq» tuqymy qazir BQO aýmaǵynda jaqsy tanymal. «Edilboıy» ǴZI ǵalymdarymen birge qazir dándi daqyldardyń, maıly daqyldardyń, mal azyǵy daqyldarynyń býdandaryn shyǵarý jóninde tájirıbe júrgizilip jatyr. Ǵylym men bilim – bizdiń reseılik áriptesterimizben aramyzdy jalǵap jatqan mańyzdy joldyń biri osy» dedi Narıman Tóreǵalıuly óz sózinde.
Oblys ákimi joǵary bilikti mamandardy daıarlaýda Saratov oblysynyń jetekshi ýnıversıtetterimen áriptestik ornatýǵa qyzyǵýshylyq tanytty. Ol halyqaralyq yntymaqtastyq aıasynda batysqazaqstandyq ǵalymdar Saratov oblysynyń joǵary oqý oryndarymen birlesip, aýyl sharýashylyǵy, halyqaralyq quqyq, medısına salasynda túrli jobany júzege asyryp, magıstranttar men aspıranttardy taǵylymdamadan ótkizip, oqytatynyn atap ótti.
Kórshiles oblystardyń arasynda mádenı baılanystar da jaqsy qalyptasqan. BQO ónerpazdary Reseıde de tanymal. О́tken jyly oraldyq A.N.Ostrovskıı atyndaǵy drama teatr ujymy gastroldik saparmen Penza oblysyna baryp qaıtty. Báıterek aýdany Orynbor qalasynda «Týǵan jerim tamasha» atty ádemi konsert qoıdy. Mundaı mádenı baılanystar eki elarasyndaǵy dostyqty bekite túseri anyq.
Oral qalasyndaǵy «Atameken» óner ordasynda ótken eki oblys delegasııasynyń kezdesýinde Saratov oblysy Úkimeti tóraǵasynyń orynbasary Alekseı Nıkıtın bastaǵan delegasııa músheleri kezegimen sóz alyp, ekijaqty iskerlik qarym-qatynastyń paıdasy týraly oılaryn ortaǵa saldy.
Tarıhqa kóz salsaq, Qazan tóńkerisine deıin Saratov ýnıversıtetinde 6 qazaq oqyǵan eken. Bir qyzyǵy, Ǵumar Esenǵulov, Mırahmed Nııazov, Batyrǵalı Júsipqalıev, Baqtyǵalı Bısenov, Yqylas Shuǵylov, Esenǵalı Qasabolatovtyń bári de joǵary dárigerlik bilim alǵan. Arada ǵasyrdan asa ýaqyt ótkende osynaý bilim sapary taǵy jalǵasatyn túri bar. Oraldaǵy kezdesý kezinde Batys Qazaqstan oblystyq densaýlyq saqtaý basqarmasy basshysynyń orynbasary Gúlnár Abdrahmanova men V.I.Razýmovskıı atyndaǵy Saratov memlekettik medısına ýnıversıtetiniń rektory Andreı Eremın ózara áriptestik jónindegi memorandýmǵa qol qoıdy.
Batys Qazaqstan oblysynda joǵary bilimdi dáriger mamandar tapshylyǵy kóp jyldan beri kún tártibinen túspeı kele jatyr. Qazirdiń ózinde óńirde 300-den astam dáriger – akýsher-gınekolog, anestezıolog, reanımatolog, kardıolog, nevrolog pen terapevt, jalpy praktıka dárigerleri men hırýrgter jetispeıdi. Oral qalasyndaǵy Joǵary medısınalyq kolledj ben «Maqsat» medısınalyq kolledji janynan osydan tórt jyl buryn jergilikti stýdentterdi Saratov ýnıversıtetinde daıyndaý maqsatynda resýrstyq ortalyq ashylǵan bolatyn. Reseılik qonaqtar osy oryndardy aralap kórip, jumysymen tanysty.
A.Eremınniń aıtýynsha, Saratov ýnıversıtetinde qazir 10 myńnan asa stýdent bilim alady. «Sonyń 1400-den astamy álemniń 54 memleketinen kelip oqıtyn sheteldik jastar. Biz Reseı Federasııasynyń eń úzdik joǵary oqý oryndary qataryna kiremiz. Oral qalasynda bolashaq stýdentterimizdi daıarlaıtyn resýrstyq ortalyqqa tolyq aqparattyq, ádistemelik kómek kórsetýge ázirmiz», dedi rektor.
«Batys Qazaqstan úshin Saratov oblysy – negizgi seriktestiń biri. Búgin biz yntymaqtastyqty odan ári nyǵaıtý keleshegin jan-jaqty talqylap, ony tereńdetý jóninde pikir almastyq. Osy múmkindikti paıdalana otyryp, saratovtyq áriptesterimizdi bıyl kúzde Batys Qazaqstan oblysynda ótetin Qazaqstan-Reseı forýmyna shaqyramyn», dedi Narıman Tóreǵalıev qos delegasııanyń kezdesýin qoryta kelip.
Reseılik tarap ta ekijaqty baılanystardy belsendi damytýǵa, nyǵaıtýǵa daıyn ekenin bildirdi.
Batys Qazaqstan oblysy