Áleýmettik jelide eks-mınıstr Qýandyq Bıshimbaevtyń ákesi Tarazda «Bishimbayev University» degen ataýmen jeke joǵary oqý ornyn ashatyny týraly aqparat taraǵan bolatyn. Ǵylym jáne joǵary bilim mınıstrliginiń baspasóz hatshysy, Jurtshylyqpen baılanys departamentiniń dırektory Oljas Berkinbaev Facebook paraqshasynda osy málimetke oraı aıtylǵan mınıstrliktiń málimdemesi týraly jazdy, dep habarlaıdy Egemen.kz.
«QR-nyń «Bilim týraly» Zańynyń 5-3-babyna sáıkes, kadrlar daıarlaý baǵyttary men oqytý nysandary boıynsha joǵary jáne joǵary oqý ornynan keıingi bilim berý salasynda bilim berý qyzmetimen aınalysý úshin zańdy tulǵalarǵa lısenzııa jáne (nemese) lısenzııaǵa qosymshany berý – ǵylym jáne joǵary bilim salasyndaǵy ýákiletti organnyń quzyretine jatady», dep jazdy O.Berkinbaev.
Onyń aıtýynsha, osyǵan baılanysty, joǵary jáne joǵary oqý ornynan keıingi bilim berý salasyndaǵy kez kelgen bilim berý qyzmeti mindetti túrde lısenzııalanýǵa jatady.
«QR-nyń «Ruqsattar jáne habarlamalar týraly» Zańyna sáıkes, ruqsat berý nemese habarlama tártibi belgilengen qyzmetti nemese áreketterdi (operasııalardy) jeke jáne zańdy tulǵalardyń tıisti ruqsat almaı nemese tıisti habarlamany jibermeı júzege asyrýyna jol berilmeıdi», dep jazǵan ol.
Oljas Berkinbaevtyń jazýynsha, Mınıstrlik «Bishimbayev University» ataýymen bilim berý qyzmetin júzege asyrýǵa lısenzııa berilgenin joqqa shyǵarady, sondaı-aq «e-lısenzııalaý» aqparattyq júıesinde tıisti ótinimniń bolmaǵanyn habarlaıdy.