ASTANA. 11 aqpan. Búgin Qazaqstan Bas prokýratýrasy ishki ister organdarymen birlese otyryp, Qazaqstan azamaty Araık Aıvazıandy Armenııadan ekstradısııalaýǵa qol jetkizdi. Bul týraly Bas prokýratýranyń baspasóz qyzmeti habarlady.
A.Aıvazıanǵa iri kólemde alaıaqtyq jasady degen aıyp taǵylyp otyr. Osy úshin oǵan Qyzylorda oblysynyń prokýratýra organdary izdeý jarııalaǵan bolatyn.
A.Aıvazıan 2011 jyly qurylys kompanııasynyń atqarýshy dırektory bolǵan kezinde Aral qalasyndaǵy kólik joldaryn jóndeýdi oryndaý barysynda 62 501 620 teńge somasyndaǵy bıýdjettik qarajatty urlaǵan. Tergeý barysynda aıyptalýshy tergeý organdarynan jasyrynyp qalǵan jáne onyń turǵylyqty mekenin anyqtaý uzaq ýaqyt boıy múmkin bolmaǵan.
Aıvazıan 2014 jylǵy qyrkúıekte Erevan qalasynda ustalǵannan keıin Qazaqstannyń Bas prokýratýrasy belgilengen tártip boıynsha ony qylmystyq jaýapkershilikke tartý úshin ustap berý týraly suraý joldaǵan jáne armıan tarapy bul suraýdy aǵymdaǵy jylǵy qańtarda qoldady.
Qazirgi tańda Qyzylorda oblysynyń arnaıy prokýrorlary atalmysh qylmystyq is boıynsha tergeý júrgizýde.
Qurysh Nurymbet.
Derek: Qazaqstan Bas prokýratýrasynyń baspasóz qyzmeti.