ASTANA. 11 aqpan. Qazaqstandaǵy eń ataǵy joǵary boksshy qyz Marına Volnova qazirgi kúnderi ana atanýǵa daıyndalyp júr. Bul týraly «Kazahstanskaıa pravda» habarlady.
Qazaqstanda bokstan udaıy bir qalypty óner kórsetip, joǵary tabystarǵa jetip kele jatqan birden-bir boksshy Marınanyń sońǵy jarysy kúzde Inchhonda ótken Azııa oıyndary boldy. Sol saıysta ol taǵy da óziniń joǵary deńgeıin tanytyp, qola medaldiń júldegeri atandy. Al Oıyndardan keıin Marınanyń jańa ómiri bastaldy: ol qolǵabyn shegege ildi, turmys qurdy...
Osylaısha Marına Volnova jańa ómirdiń tabaldyryǵynan attady. London Olımpıadasynyń júldegeri qazir Astana qalasynda turady. Ana bolýǵa daıyndalyp júr. Qazaqstan boksynyń maqtanyshy bolǵan qyzdyń qandaı josparlary bar eken. Muny odan Kazpravda.kz tilshisi surady.
– Umytpaǵandaryńyz úshin rahmet, – dedi Marına tilshige. – Júktilik kezeńi jaqsy ótip jatyr. Jaratqan qoldasa, mamyr aıynda ana bolamyn. Men turmysym úshin sheksiz baqyttymyn. Bala tárbıesine psıhologııalyq jaǵynan daıyndalyp júrmin. Bári jaqsy bolýǵa tıis!
- Boksty qoıǵan kezińizde siz ulttyq quramaǵa sózben de, ispen de kómek beretinińizdi aıtyp edińiz...
- Iá, meniń jarystardan alǵan tájirıbem mol. Quramadaǵy qurbylarym úshin de qashanda ázirmin. Álem chempıonaty aldynda qyzdar maǵan kelip ketti. О́te jaqsy áser etti. Men qolymnan kelgenshe olarǵa dem berip baqtym.
Bilesizder me, men Qazaqstan úshin Chedjýdiń tabysty bolatynyna sendim. Bizdiń quramadan shyqqan tuńǵysh álem chempıony Nazym Qyzaıbaıdyń jeńisine qýanyshtymyn. Men onyń qalaı jumys isteıtinin jattyǵý kezinde kórgenmin. Men úshin onyń osyndaı jetistikke jetýi tań qalarlyq nárse bolǵan joq.
Qazaqstannyń áıelder boksy údemeli túrde damyp keeldi. Qazir bizdiń komandamen jurttyń bári sanasady. Sońǵy nátıjeler (ótken jyly Qazaqstan quramasy Azıada men planeta jarysynda eki júldeden aldy) – osyǵan dálel. Biz kez kelgen qarsylaspen teń shaıqasýǵa daıynbyz.
- Sizdiń rıngke qaıta oralýyńyz múmkin be? Nemese jattyqtyrýshylyq jolǵa aýysasyz ba?
- Ázirge bul suraqtar ashyq kúıinshe qalsyn. Dál qazirgi sátte meniń múlde basqa josparlarym bar.
Eske sala keteıik, Marına Volnova Qazaqstan áıelder quramasyndaǵy Olımpıadanyń qola júldegeri, álemniń kúmis jáne qola júldegeri, Azııa oıyndarynyń qola júldegeri, Azııa chempıony degen ataqtardy jeńip alǵan jalǵyz boksshysy. Ol 75 jáne 81 kıloǵa deıingi, 81 kılodan aýyr salmaqtarda óner kórsetti. Jattyqtyrýshy Berik Myrjyqpaevtyń shákirti. Qazaq tilin óte jetik biledi.
Rýslan Igilik.