Keshe keshki saǵat 20:35-te Úbi ózenindegi muz keptelisinen sý deńgeıiniń kóterilýine baılanysty Borodýlıha aýdanyna qarasty Krasnyı Iаr aýylyndaǵy ózenge jaqyn bir kóshesin sý basý qaýpi týyndaǵan edi.
Tótenshe jaǵdaılar qyzmeti, jergilikti atqarýshy organdar, jedel qutqarý jasaǵy men polısııa bólimsheleri bar jıyny 123 adam jáne 39 tehnıka, onyń ishinde 3 júzý quraly aýylǵa shoǵyrlandyryldy. Qaýiptiń betin qaıtarý jumysy júrilip jatyr.
Qamdanǵan qapy qalmas dep keshe qaýipsizdik maqsatynda aýyldaǵy ózen jaǵasyna jaqyn kósheniń 26 turǵyny óz erikterimen mektepke ýaqytsha ornalastyryldy. Jergilikti atqarýshy organdardyń ókilderi aýlalaryn sý basýy múmkin turǵyndardyń maldaryn basqa sharýa qojalyqtaryna jetkizdi.
Oblys ákimi Berik Ýálı búgin, tańerteń erte Borodýlıha aýdanyna arnaıy bardy.
Tótenshe jaǵdaılar departamenti bastyǵy Manarbek Shapaǵatovpen birge áýeli Úbi ózenindegi sý deńgeıin tikushaq arqyly áýeden baqylady. Sodan keıin aýylǵa kelip, jedel shtabtyń jıynyn ótkizdi.
Tótenshe jaǵdaılar departamenti bastyǵynyń orynbasary Azamat Orymbaev pen aýdan ákimi Aıdar Ibraev aımaq basshysyna ahýaldy baıandap berdi. Aýdan ákiminiń aıtýynsha, eldi mekendegi ózen jaǵasyna jaqyn 30 shaqty úıdiń aýlasyna sý kirgen.
Eldi mekende jedel shtab qurylǵan. Oǵan oblys ákiminiń orynbasary Dımıtrıı Garıkov jetekshilik etedi. Úbi ózenindegi muz keptelisin joıyp, sý arnasyn tolyq ashý úshin muz jarý jumysy júrgizilip jatyr.
Aýyldaǵy basqa aýlalarǵa sýdyń kirýine jol bermes úshin tıisti shara qoldanyldy.
«Krasnyı Iаr - aýdandaǵy jyl saıyn sý basý qaýpi tónetin aýyldardyń biri. Eldi mekendegi jaǵdaıdy kesheden beri jeke baqylaýymda ustap otyrmyn. Aýdan ákimi men tıisti qurylymdarǵa turǵyndarǵa túsinikteme jumystaryn júrgizýdi, jaǵdaıdy únemi baqylaýda ustaýdy tapsyramyn. Muz jarý jumysyn keshke deıin aıaqtaý qajet», dedi aımaq basshysy.
Abaı oblysy