Aýǵanstannyń Host qalasynda turatyn Aqel Nazır esimdi qarııa óziniń jasy 140-ta ekenin aıtyp, álemdegi eń jasy úlken adam atanýǵa úmitker bolyp otyr. Bul týraly jergilikti TOLO News aqparattyq agenttigi habarlady, dep jazady Egemen.kz.
Aqsaqaldyń aıtýynsha, ol Amanýlla hannyń tusynda – Aýǵanstan Ulybrıtanııadan táýelsizdik alǵan kezdiń ózinde-aq 30 jastan asqan eken. Tipti sol tarıhı sátte koroldiń janynda bolyp, jeńisti toılaǵanyn da eske alady.
«Men Amanýlla hanmen birge saraıda boldym. Ol kezde 30-dan asqan edim. Brıtandyqtar tize búgip, qashyp ketti degendi estigende halyq qatty qýandy. Bárimiz patshaǵa alǵysymyzdy bildirdik. Ol kezde birge bolǵan kóptegen basshylar qazir ómirden ótti», deıdi Aqel Nazır.
Qarttyń týǵan jyly týraly naqty qujat bolmaǵanymen, týystary onyń jasyn rastaıtyn resmı tekseris júrgizýdi surap otyr. Qazir onyń áýletinde 100-den astam urpaǵy bar.
Host gýbernatorynyń baspasóz hatshysy Mýstaǵfar Gýrbazdyń málimdeýinshe, qarııanyń jasyn anyqtaý úshin arnaıy tehnıkalyq top qurylady. Eger derek rastalsa, Aqel Nazırge medısınalyq kómek kórsetilip, Gınnestiń rekordtar kitabyna engizý máselesi qaralady.
«Biz azamattyq jaǵdaı aktilerin tirkeý organy janynan tehnıkalyq top jiberýdi josparlap otyrmyz. Eger 140 jasty rastaýǵa bolatyn dálel tabylsa, ony álemdegi eń qart adam retinde tirkeý jumystaryna kirisemiz», dedi baspasóz hatshysy.