Qazaqstan Úkimetiniń qaýlysymen Qostanaı qalasyndaǵy №9 qazaq orta mektebine kórnekti aqyn, jazýshy Ǵafý Qaıyrbekovtiń esimi berildi. Qostanaı qalasynda basty kóshelerdiń biri de qazaq poezııasynyń dúldúli esimimen atalady. Ǵafý aqyn:
«Qaıda júrsem, seni esimnen tastamaı,
О́tip ketti jaqsy jyl men jas talaı.
Meniń atym saǵynysh bop ózgerdi,
Saǵynyshqa qolyńdy ber, Qostanaı!»
dep jyrlaǵan týǵan jerinde kóshe men mektep tutas ansambl quryp turǵanyn jurty qalaǵan edi. Biraz kúttirgen jyldardan keıin aqyn jyrlaryna tánti halqynyń tileýi oryndaldy.
– Týǵan jeri azamatyn, aqynyn syılap, bilim oshaǵyna Ǵafekeńniń atyn bergenine rızamyn. Mektep oqýshylary atasynyń atyna kir keltirmeı, bilimdi azamat bolsyn, – dedi aqynnyń jary Bádesh Hamzına. Saltanatty is-sharada Qostanaı qalasy ákiminiń orynbasary M.Qalıev, aqyndar A.Shaıahmet, S.Ospanov, N.Muqatov, jazýshy-satırık Ǵ.Ahmetchın, til janashyry Q.Ormanov, Jangeldın aýdany ákiminiń ekonomıka jónindegi orynbasary D.Serikuly, №9 orta mektep dırektory Á.Moldahalyqov jáne oblystyq tilderdi damytý basqarmasynyń ókilderi qatysyp, jyly lebizderin bildirdi.
Osy sharaǵa oraı aqynǵa arnalǵan ádebı kesh ótti. Mektepte Bádesh apaıdyń bastamasymen jáne onyń izdenýimen, kómegimen Ǵafýdyń mýzeıi jasaqtalǵan edi. Keshke qatysýshylar osy mýzeıdi aralap kórdi, bilim oshaǵynyń ónerli balalary qoıǵan konsertti tamashalady.
Názıra JÁRIMBETOVA
«Egemen Qazaqstan».
QOSTANAI.