Frankofonııa kóktemi bıyl 1 sáýir men 31 mamyr aralyǵynda ótedi. Mádenı is-sharany Armenııa, Belgııa, Latvııa, Lıtva, Rýmynııa, Fransııa jáne Shveısarııa elshilikteri birlesip ótkizedi, dep habarlaıdy Egemen.kz.
Frankofonııa kóktemi - fransýz tili men frankofonııa mádenıetteriniń alýan túrliligine arnalǵan mádenıettiń kópsalaly festıvali. Ortalyq kommýnıkasııalar alańynda ótken brıfıngte Armenııanyń elimizdegi Tótenshe jáne О́kiletti Elshisi Armen Gevondıan Frankofonııa kókteminiń 15-maýsymy mádenı-gýmanıtarlyq sıpattaǵy kezekti oqıǵa emes ekendigin, elimizde jyl saıyn fransýz tili men mádenı alýandyǵyn ilgeriletý, bilim berý men qaıta daıarlaýdy yntalandyrý, mádenıetter men órkenıetter dıalogyn jandandyrý tóńireginde elder men halyqtardy biriktirýge, yntymaqtastyqty nyǵaıtýǵa baǵyttalǵan is-sharalar ótkiziletinin atap ótti.
«Frankofonııa – bul halyqtarǵa mádenıetti tereńirek qabyldaýǵa múmkindik beretin, sol arqyly memleketaralyq yntymaqtastyq palıtrasyn baıytatyn mádenıetter, dástúrler, erekshe ádet-ǵuryptardyń tyǵyz toǵysýy. Sońǵy jyldary Armenııa men Halyqaralyq frankofonııa uıymy arasyndaǵy yntymaqtastyq jańa serpin aldy. Armenııada Frankofonııanyń onynshy sporttyq jáne mádenı oıyndaryna daıyndyq júrip jatyr, ony 2027 jyly 23 shildeden 1 tamyzǵa deıin Erevanda ótkizý josparlanǵan. Bul Frankofonııa elderimen dostyq qarym-qatynasty nyǵaıtyp qana qoımaı, Armenııada fransýz tiliniń taralýyna eleýli úles qosý úshin uıymdastyrylmaq», dedi Armenııa elshisi.
Armen Gevondıannyń aıtýynsha, bıyl Astana, Almaty, Qaraǵandy jáne Shymkentte kórnekti armıan rejısseri Serj Avedıkıannyń «Kútken adam» fılminiń kórsetilimi uıymdastyrylady.
Belgııanyń Qazaqstandaǵy Tótenshe jáne О́kiletti Elshisiniń orynbasary Antýan Bıname festıval aıasynda óńirlerde frankofondyq kıno aptalyǵy ótetinin aıtty.
«Biz belgııalyq fılmderdiń kórsetilimderin uıymdastyryp jatyrmyz. Astana men Almatyda «Omen» fılmi kórsetiledi. Qaraǵandyda «Jıýlı nege úndemeıdi» fılmin kórermenge usynamyz. 18 sáýirde Almatyda qazaq jáne fransýz tilindegi ádebıetke arnalǵan is-shara ótedi. Belgııalyq avtorlar men ıllıýstratorlar Elen Delforj Kenten Greban onlaın rejıminde ıllıýstrasııalanǵan kitaptar jasaý tájirıbelerimen bólisedi. Osy is-shara aıasynda Qaraǵandyda «Komıkster arqyly Belgııa boıynsha saıahat» kórmesin tamashalaýǵa bolady. Sondaı-aq «Anashym» atty kitapty qazaq tilinde usynamyz», dedi Antýan Bıname.
Al Lıtva Respýblıkasynyń elimizdegi Tótenshe jáne О́kiletti Elshisi Egıdııýs Navıkas Lıtva 1999 jyldan beri Halyqaralyq frankofonııa uıymynyń baqylaýshy múshesi ekenin atap ótti. Fransýz tili - Lıtvada eń kóp taralǵan tórtinshi til. Elde Fransııamen mádenı yntymaqtastyqtyń joǵary deńgeıi baıqalady.
«Men úshin «Frankofonııa kóktemine» qatysý zor mártebe. El turǵyndaryn is-sharalarǵa qatysýǵa, fılmder kórýge, gastronomııalyq is-sharalarǵa qatysýǵa shaqyramyn. Kóptegen qyzyqty jáne jaǵymdy dúnıelermen tanysýǵa múmkindik bar», dedi elshi.
Fransýz tili sóıleıtinder sany boıynsha álemde 5-shi orynda tur. 29 elde jáne halyqaralyq uıymdarda BUU, NATO, EO, Halyqaralyq komıtet, Islam Yntymaqtastyǵy Uıymy sııaqty resmı til mártebesine ıe, bul fransýz tiliniń úlken dıplomatııalyq ártúrliligin kórsetedi.
«Qazaqstandaǵy fransýz tiliniń mártebesine keletin bolsaq, búgingi tańda Fransııa elshiligi 11 myń oqýshyǵa fransýz tilin oqytýdy qoldaıdy. Atap aıtqanda, elshilik Astana, Almaty, Qaraǵandy jáne Aqtaý qalalarynda eki tildi seksııalar qurylǵan tórt mektepte jumys isteıdi. Sondaı-aq biz Astana, Almaty, Qaraǵandy jáne Shymkenttegi mádenı ortalyqtarymyz, Fransýz alıanstarymen yntymaqtastyq ornattyq. Sonymen qatar Astana men Almatyda eki fransýz mektebin ashý jobasy boıynsha jumys istep jatyrmyz. Bul mektepter múmkindiginshe tez ashylady degen úmittemiz», dedi Fransııanyń Qazaqstandaǵy Tótenshe jáne О́kiletti Elshisi Sılvan Gıoge.