L.N.Gýmılev atyndaǵy Eýrazııa ulttyq ýnıversıteti janyndaǵy «Káýsar» mádenı-tanymdyq birlestiginiń uıymdastyrýymen aqyn, qoǵam qaıratkeri, Jýrnalıster odaǵy Á.Bókeıhan atyndaǵy syılyǵynyń laýreaty Baqytjan Tobaıaqpen kezdesý ótti. Keshti Qazaqstannyń eńbek sińirgen ártisi, Abaı atyndaǵy memlekettik syılyqtyń laýreaty Kenjeǵalı Myrjyqbaı júrgizdi.
Alǵashqy quttyqtaý sózdi jýrnalıstıka jáne saıasattaný fakýltetiniń dekany, jazýshy Nurjan Qýantaıuly jetkizdi. Keshtiń shymyldyǵy ýnıversıtet stýdentteriniń aqyn óleńderin jatqa oqýymen ashyldy. «Bıler qaıda?», «Máńgi tilim», «Týǵan jer kóktemi», «Atameken» syndy óleńder kórermen qaýymnyń yqylasyna bólendi.
Aqynnyń zamandastary Ýálıhan Qaısarov pen Asqar Tájıev dostary týraly estelikterin aıtyp, shyǵarmashylyǵyndaǵy ózekti taqyryptarǵa toqtaldy.
Suhbat formatynda órbigen kezdesýde avtorǵa qyzyqty saýaldar qoıylyp, B.Tobaıaqtyń óleńimen qatar, ómiriniń sáýleli sátteri, shyǵarmashylyǵynyń mazmundy betteri keńinen áńgimelendi. Kesh ıesi baldyrǵan shaǵynda qazaqtyń qabyrǵaly qalamgerleri Muhtar Áýezov pen Sábıt Muqanov syndy alyptardy kózimen kórip, ádebıetke degen qushtarlyǵy sol kezden bastalǵanyn tebirene eske aldy.
Kesh sońynda ýnıversıtet rektorynyń arnaıy tapsyrmasymen aqynǵa L.N.Gýmılev atyndaǵy medal tabystaldy.
Asylzat ÁDILBEK,
L.N.Gýmılev atyndaǵy EUÝ stýdenti