Májilis tóraǵasy Erlan Qoshanov Astanaǵa resmı saparmen kelgen Izraıl Knessetiniń spıkeri Amır Ohanamen kezdesti. Taraptar parlamentaralyq yntymaqtastyqtyń keleshegin talqylady.
Palata tóraǵasy Izraıl Qazaqstannyń Taıaý Shyǵystaǵy negizgi seriktesiniń biri ekenine nazar aýdaryp, Qazaqstan Izraılmen jan-jaqty yntymaqtastyqty kúsheıtýge múddeli ekenin atap ótti.
– 30 jyldan asa ýaqyt ishinde Qazaqstan men Izraıl arasynda joǵary senimge negizdelgen saıası dıalog ornatyldy. Bul turǵyda Qazaqstan Prezıdenti Qasym-Jomart Toqaev pen Izraıl Prezıdenti Isaak Gersogtiń jýyrdaǵy telefon arqyly sóılesýin erekshe atap ótken jón. Áńgimelesý barysynda Izraıl Prezıdentiniń bıyl Astanaǵa resmı saparyn ótkizý týraly ýaǵdalastyqqa qol jetkizildi. Bul Qazaqstan-Izraıl yntymaqtastyǵyn damytýdaǵy mańyzdy kezeńge aınalatyny jáne elderimizdi jaqyndastyrýǵa eleýli úles qosatyny sózsiz, – dedi E.Qoshanov.
Májilis spıkeri mártebeli meımanǵa Memleket basshysynyń bastamasymen elimizde júrgizilip jatqan aýqymdy saıası-ekonomıkalyq reformalardyń nátıjeleri týraly aıtyp berdi.
Sonymen qatar taraptar ekijaqty áriptestikti damytýda zań shyǵarýshy organdardyń róline toqtalyp, parlamentaralyq baılanysty tereńdetýge ýaǵdalasty.
– Biz Izraılmen parlamentaralyq yntymaqtastyqty keńeıtýge múddelimiz. Bolashaqta dostyq toptar men beıindi komıtetter deńgeıindegi yqpaldasýymyzdy odan ári nyǵaıtýǵa shaqyramyn, – dedi Palata tóraǵasy.
Kezdesý barysynda saýda-ekonomıka, aýyl sharýashylyǵy, IT, jasandy ıntelleket, densaýlyq saqtaý, sý resýrstaryn basqarý men mádenı-gýmanıtarlyq salalardaǵy seriktestik máseleleri de qozǵaldy.
О́z kezeginde Amır Ohana memleketterimiz arasyndaǵy yntymaqtastyq qarqyndy damı beretinine senim bildirip, Qazaqstanmen jańa tehnologııa, ınnovasııa salasynda tájirıbe almasýǵa daıyn ekenin aıtty.
– Bolashaq tehnologııa, ınnovasııa men bilimde ekenin bárimiz jaqsy túsinemiz. Osy oraıda eki eldiń ıgiligi úshin bar kúsh-jigerimizdi biriktirýge bolady dep sanaımyz. Sizdermen jıǵan bilimimizben, ıdeıalarymyzben jáne tehnologııalarymyzben bólisýge daıynbyz, – dedi A.Ohana.
Kezdesý sońynda taraptar mundaı saparlar elderimizge ekijaqty yntymaqtastyqty, halyqtarymyz arasyndaǵy dostyq pen parlamentaralyq baılanysty nyǵaıtýǵa mol múmkindik beretinin atap ótti.