Petropavldyq keı sheneýnikter arasynda osyndaı túsinik qalyptasqanyna qala aralaǵan saıyn kóz jetkizýge bolady
Oblys ortalyǵynyń basty kósheleri aǵashtan kende deı almaımyz. «Jasyna jetip, qartaıǵandary», bir jaǵynan, elektr, telefon baılanysy jelilerine bóget bolmasyn degen nıetpen kesilip tastalady. Kóktemge qaraı orny opyraıyp qalǵan jerlerge múmkindigine qaraı jas kóshetter egilip jatady. Mundaı ıgi sharalardyń atqarylýy, ıaǵnı qalany, qorshaǵan ortany jasyl jelekke oraýǵa, ekologııany jaqsartýǵa degen umtylys quptarlyq bolǵanymen, «áttegen-aılar» da kezdesip qalatyny kóńilge kirbiń uıalatady.
Bıyl jazǵyturym K.Sútishev jáne Mır kósheleri qıylysynda «Samovar» dámhanasynan «Rahmet» saýda úıine deıingi aralyqqa ardagerlerdiń qatysýymen ótken aksııa barysynda ondaǵan túp aq qaıyń otyrǵyzyldy. Japyraqtary qyltıyp shyǵa bastaǵan aǵashtardyń butaqtary bir-birine tııýge jaqyn tur. Sońyra boılap ósken kezde Abaı kóshesindegi qaıyńdardaı sholtıtyp kesip tastamaq pa?
Mamyr aıynyń sońynda taǵy bir qyzyq naýqannyń kýási boldym. О́zim turatyn «Bereke» shaǵyn aýdanyndaǵy Á.Dosmuhambetov kóshesine japyraǵy shyǵyp qalǵan, boıy 2 metrden asatyn 13 túp qaıyń egildi. О́sip ketse eken degen tileýdemin. Biraq qazirdiń ózinde olardyń jas sábıdiń alaqanyndaı bolyp ósip qalǵan jap-jasyl japyraqtary qýraı bastaǵan. О́ıtkeni, egetin kezi ótip ketken.
Eshkimge paıdasy joq naýqanshylyq kimge qajet boldy eken? Álde qala bıýdjetin maıshelpekshe kóretin bázbireýlerdiń ádeıi jasap otyrǵan kórpe astyndaǵy jasyrynbaq oıyn-ermegi me?
Nursaıyn ShÁRIP.
PETROPAVL.