Jáńgir han atyndaǵy Batys Qazaqstan agrarlyq-tehnıkalyq ýnıversıtetinde «Ǵylym, zertteýler, bilim: damý tendensııalary» atty XXV halyqaralyq ǵylymı-praktıkalyq konferensııa ótti dep habarlaıdy Egemen.kz.
Ǵylym aılyǵy aıasynda ótken jıynǵa Reseı jáne Tatarstan, Qytaı, Egıpet, О́zbekstan elderinen kelgen sheteldik ǵalymdar men óz elimizden túrli sharýashylyq salalarynyń kásibı mamandary qatysty. Ǵalymdar alqaly basqosýda qoı sharýashylyǵynyń qazirgi jaǵdaıy men damýy, qazaq jylqysynyń genetıkalyq resýrsyn saqtaý jáne ártúrliligin zertteý, qurylys salasyndaǵy múmkindikter men tıimdi bastamalar, ónerkásip nysandaryn uıymdastyrý-tehnologııalyq daıarlaý úshin sıfrlyq modelderdi damytý, sazdy topyraqta ósiriletin tropıkalyq jemisterdiń ónimdiligine sýarýdyń áseri t.b. san salaly taqyrypty taldap, tájirıbe almasty.
«Men jylqy sharýashylyǵy, jergilikti tuqymdardy seleksııalaý, genetıkasyn anyqtaý, sútti baǵyttaǵy jylqylardy damytý boıynsha Jáńgir han ýnıversıtetiniń ǵalymdarymen birge zertteý jumysyn júrgizip jatyrmyn. Seleksııa salasynda bizdiń de birneshe jyldyq tájirıbemiz bar. Sútti baǵyttaǵy jylqyny kóbeıtý maqsatynda genetıkalyq ádistemelerdi seleksııaǵa qostyq. Jáńgir han ýnıversıteti de osy baǵytta úlken ǵylymı jobany qolǵa alǵan. Osy oraıda qos tarap óz tájirıbemizdi ortaǵa salyp, eki eldiń jylqy sharýashylyǵyn damytýǵa úles qosamyz degen oıdamyn. Jalpy Qazaqstanda mal sharýashylyǵy salasyndaǵy ǵylymı jumys jaqsy júrip keledi. Osy baǵytta tańdaýymyz ǵylymı áleýeti joǵary Jáńgir han atyndaǵy Batys Qazaqstan agrarlyq-tehnıkalyq ýnıversıtetine túsken edi», deıdi Qytaıdyń Tarım ýnıversıtetinen kelgen professor, óz qandasymyz Ǵunymgúl Muhataı.
Tımırıazev atyndaǵy Reseı memlekettik agrarlyq ýnıversıtetiniń professory Iýsýpjan Iýldashpaev ta osyndaı halyqaralyq dárejedegi konferensııalar eldiń ǵylymǵa degen oń kózqarasyn bildiretinin aıtady.
«Bıyl Oral qalasynda ótip jatqan halyqaralyq ǵylymı-praktıkalyq konferensııa mereıtoılyq datada, ıaǵnı 25-shi jyl qatarynan ótip jatyr. Biz Jáńgir han ýnıversıtetimen kóp jyldan beri áriptestik baılanystamyz. Osy oqý ornynyń kóptegen ǵalymy Tımırıazev ýnıversıtetinde kandıdattyq dıssertasııa qorǵady, magıstratýrada oqydy, ǵylymı taǵylymdamadan ótti. Kadr daıarlaý salasyndaǵy júıeli jumysymyz aldaǵy ýaqytta da jalǵasary sózsiz. Sondaı-aq biz janýarlar genetıkasy, molekýlalyq-genetıkalyq zertteýler jáne qazirgi zaman talabyna sáıkes keletin janýarlardyń jańa túrleri men tuqymdaryn jasaý salasyndaǵy ozyq tehnologııa boıynsha yntymaqta jumys isteımiz. Negizinen Qazaqstanda ǵylym jaqsy damyp keledi. Ásirese sońǵy jyldary memleket tarapynan ǵylymǵa barynsha kóńil bólinip otyr», dedi reseılik professor.
Jáńgir han ýnıversıtetiniń negizgi baǵyty agrarlyq sala. Sondyqtan, mundaǵy ǵylymı zertteýler taqyryby da aýyl sharýashylyǵy janýarlarynyń genetıkasyna, olardyń ártúrli aýrýlary men emdeý is-sharalaryna zertteý júrgizýge, jańa tuqymdardy kóbeıtýdiń tásilderin oılap taýyp, is júzinde tájirıbege engizýge negizdelgen. «Bizdiń ǵylymı qyzmetkerlerimizdiń qatary jyl saıyn sheteldik jetekshi ýnıversıtetter men zerthanalarda, ǵylymı ortalyqtarda taǵylymdamadan ótip kelgen ǵalymdarmen tolyǵady» deıdi ýnıversıtettiń ǵylym jónindegi prorektory Áljan Shámshidin.
Jáńgir han ýnıversıtetinde ǵylym aılyǵy aıasyndaǵy is-sharalar sáýir aıynyń sońyna deıin jalǵasady.