Elimizdegi ǵylym qyzmetkerleri kúnine jáne akademık E.Bóketovtyń 100 jyldyǵyna oraı Mahambet О́temisuly atyndaǵy Batys Qazaqstan ýnıversıtetinde stýdentterdiń respýblıkalyq ǵylymı-tájirıbelik konferensııasy ótti dep habarlaıdy Egemen.kz.
Konferensııa barysynda ýnıversıtettiń ǵylymı-zertteý baǵytyndaǵy sońǵy jetistikteri men bolashaqqa josparlanǵan basym baǵyttary kópshilikke tanystyryldy. Ǵylymı jumys jáne halyqaralyq baılanystar jónindegi prorektor Qajymurat Ahmedenov ýnıversıtettegi ǵylymı-zertteý jumystarynyń 2024-2025 jylǵy qorytyndylary jaıly baıandama jasap, zertteý jobalary men qol jetkizilgen nátıjelerge toqtaldy. Fılologııa ǵylymdarynyń kandıdaty, dosent Zeınolla Mútıev «Ádebı ólketaný – rýhanı jańǵyrý» taqyrybynda sóılep, ulttyq rýhanııat pen ádebı murany zerdeleýdiń mańyzyn atap ótti. Jaratylystaný-geografııa fakýltetiniń dekany Ahan Turǵymbaevtyń «Qazaqstannyń batys aımaǵyndaǵy jaıylymdardyń mal azyqtyq resýrstarynyń qazirgi jaǵdaıy men paıdalanýyn baǵalaý» atty baıandamasy óńirlik ekojúıe men aýyl sharýashylyǵyn baılanystyrǵan ǵylymı taldaýdy kórsetti.
Plenarlyq otyrystan keıin ǵylym salasynda eńbek etip júrgen birqatar qyzmetker men oqytýshy marapatqa ıe boldy. «Ahmet Baıtursynuly» tósbelgisimen Altynaı Jorasova marapattaldy. 30 jyldyq tájirıbesi bar ǵylymı kitaphanashy Maqpal Ismaǵulovaǵa «Qazaqstannyń qurmetti kitaphanashysy» medali tabystaldy. Aıgúl Erǵalıeva men Aısulý Jumaǵalıeva «Ǵylymdy damytýǵa sińirgen eńbegi úshin» tósbelgisimen marapattaldy. «Ǵylym úzdigi» qurmet dıplomy bıologııa, hımııa jáne qorshaǵan orta bilim berý baǵdarlamalarynyń jetekshisi Gúlııa Sydıqovaǵa berildi. Sonymen qatar Qazaqstan Respýblıkasy Ǵylym jáne joǵary bilim mınıstrliginiń Qurmet gramotasy men Alǵys hattary da óz ıesin tapty.
Konferensııa aıasynda «Start-up WKU» baıqaýynyń jeńimpazdary jáne «Úzdik ǵylymı maqalalar avtory» nomınasııalarynyń ıegerleri marapattaldy. Jıyn sońynda ýnıversıtet kásipodaǵy atynan da birqatar ǵalymdarǵa alǵys bildirilip, marapat tabystaldy.
Batys Qazaqstan oblysy