Jyl basynan beri Ekologııa jáne tabıǵı resýrstar mınıstrliginiń mekemeleri úshin 3,7 mlrd teńge somasyna 136 shaǵyn orman órt sóndirý kesheni men 60 traktor jetkizildi. Bul týraly Mınıstrlik basshysy Erlan Nysanbaev málimdedi, dep jazady Egemen.kz.
Erlan Nysanbaevtyń málimetinshe, Maýsym aıynyń sońyna deıin taǵy 166 órt sóndirý mashınasy, 27 shaǵyn orman órt sóndirý kesheni jáne 11,3 mlrd teńge somasyna 15 traktor jetkiziledi.
«Oblys ákimdikteri orman sharýashylyǵyn jaraqtandyrýǵa bıyl jergilikti bıýdjetten 6,3 mlrd teńge jáne lızıng esebinen 20 mlrd teńge bóldi. Osylaısha, jyl sońyna deıin ákimdikterdiń orman sharýashylyqtaryna 26,3 mlrd teńge somasyna 186 órt sóndirý mashınasyn, 186 shaǵyn orman órt sóndirý keshenin jáne 247 traktor satyp alý josparlanyp otyr. Qabyldanyp jatqan sharalar elimizdiń eń órt qaýpi joǵary 11 óńirinde orman sharýashylyǵyn jańartýǵa jáne 100% jaraqtandyrýǵa múmkindik beredi», dedi mınıstr.