Keshe Astanadaǵy Ulttyq akademııalyq kitaphananyń Qazaqstan halqy Assambleıasy zalynda QHA Tóraǵasynyń orynbasary, bolgar etnomádenı birlestiginiń jetekshisi Oleg Dymovty Bolgarııanyń memlekettik nagradasy – I dárejeli «Svıatye Kırıll ı Mefodıı» ordeni – alqyzyl lentaly altyn aıshyqpen saltanatty marapattaý rásimi ótti.
Ordendi Bolgarııa Respýblıkasynyń Qazaqstan Respýblıkasyndaǵy elshisi Vasıl Petkov taqty. Naqtyraq aıtsaq, «Svıatye Kırıll ı Mefodıı» ordeni – Bolgarııa Respýblıkasynyń memlekettik nagradasy. Bul ordenmen mádenıet, óner, bilim men ǵylymnyń damýyna úles qosqan bolgarlyq jáne sheteldik azamattar marapattalady.
Shara barysynda «Qazaqstan-Bolgarııa mádenıet ortalyǵy» AQ tóraǵasy, QHA múshesi, Qazaqstannyń eńbek sińirgen qaıratkeri Oleg Dymovtyń ómirinen alynǵan beınebaıan kórsetildi. Saltanatty jıyndy Qazaqstan halqy Assambleıasy Tóraǵasynyń orynbasary Eraly Toǵjanov ashyp, Memleket basshysy N.Nazarbaevtyń quttyqtaý sózin oqyp berdi. Kóp uzamaı, Mádenıet jáne sport mınıstri Arystanbek Muhamedıulynyń júrekjardy quttyqtaýy da kelip jetti.
Sondaı-aq, O.Dymovqa prezıdenttik saılaý naýqanyndaǵy belsendiligi úshin «Nur Otan» partııasynyń atynan alǵys hat tabys etildi. Ol – 45 jyldan astam ómirin memlekettik qyzmette, onyń 14 jylyn Qazaqstan halqy Assambleıasynyń Hatshylyǵynda ótkizgen qoǵam qaıratkeri. Sondaı-aq, onnan astam kitaptyń, úsh óleńder jınaǵynyń avtory.
2005 jyly Oleg Dymov Sofııa qalasynda (Bolgarııa) N.Nazarbaevtyń bolgar tiline aýdarylǵan «Syndarly on jyl» kitabynyń tanystyrylymyn ótkizdi. Al 2007 jyly bolgar tilinde «My narod Kazahstana» atty kitaby jaryq kórdi.
Qysqasy, bul keshte tanymal tulǵa týraly ultty uıytatyn nebir ulaǵatty sózder men estelikter aıtyldy. Sonyń bir aıǵaǵy retinde, zamandas-dosy, aqyn, Qazaqstannyń eńbek sińirgen qaıratkeri О́tegen Oralbaıuly kesh ıesine arnap óz óleńin oqydy. Is-sharaǵa QHA músheleri, «Nur Otan» partııasynyń, mınıstrlikter men vedomstvolardyń ókilderi, qalalyq etnomádenı birlestikterdiń basshylary qatysty.
Raýshan TÁÝIRHANQYZY,
jýrnalıst.