Aǵashtar bir-birimen sóılesedi degenge senbessiz, biraq shyndyq. Ertede ata-babalarymyz aǵashty tiri jaratylys dep qarap, onymen syrlasqan. Sóıtsek, bul jaı senim emes, ǵylymmen negizi bar túsinik eken.
Qazirgi zaman bıologteri men mıkologteri orman aǵashtarynyń bir-birimen baılanys jasaıtynyn dáleldedi. Olar jer astyndaǵy tamyrlar arqyly ǵana emes, sol tamyrlardy oraı ósken sańyraýqulaq jipsheleri arqyly aqparat almasady. Bul kúrdeli júıe «Wood Wide Web» dep atalady – aǵylshynsha ataýynyń ózi ınternetti eske salady. Mysaly, bir aǵashty zııankester jaýlasa, kórshi aǵashtarǵa qorǵanys tetigin qosý týraly «eskertý» sıgnal jiberedi nemese úlken aǵashtar kóleńkedegi jas kóshetterge qorektik zattar berip kómektesedi.