Almaty kópsalaly klınıkalyq aýrýhanasynda byltyr 225 sheteldik azamat tegin medısınalyq kómektiń kepildik berilgen kólemi sheńberinde em alypty. Bul elimizdiń medısınasyna degen senimniń joǵary ekenin, mamandarymyzdyń biliktiligin kórsetedi.
Naýqastar arasynda Túrkııa, Úndistan, Pákistan, Qytaı, AQSh azamattary bar. Olardyń barlyǵy dárigerlerdiń kásibıligi men qyzmet kórsetýdiń joǵary deńgeıde ekenin atap ótip, em-sharalaryna rızashylyǵyn bildirgen. Mysaly, Túrkııadan kelgen pasıenttiń júregine joǵary tehnologııalyq ádispen operasııa jasaldy. «Men mundaı sapaly qyzmet alamyn dep kútken joqpyn, dárigerler tobyna óte rızamyn», deıdi ol.
Úndistannan kelgen júkti áıelge (36 apta) dárigerler shuǵyl túrde kesar tiligi operasııasyn jasap, náresteni SIPAP apparatynyń kómegimen aman alyp qaldy. «О́zimdi áldeqaıda jaqsy sezinemin, belsendi ómirimdi jalǵastyrýǵa daıynmyn, sábıim de shırap keledi», degen qýanyshymen bólisti baqytty ana.
Pákistan men Qytaıdan kelgen naýqastar da kórsetiletin medısınalyq kómektiń qoljetimdi ári sapaly ekenin aıtady. Olar medısınalyq qyzmetkerlerdiń qapysyz qarym-qatynasyn aıryqsha atap ótti. AQSh-tan Almatyǵa týrıstik maqsatta kelgen pasıentter de aýrýhananyń medısınalyq servısi týraly oń pikir bildirdi. «Velosıpedten qulap qalǵan meni dárigerlerdiń jyly qarsy alǵanyna, jiti kóńil bólgenine razy boldym. Emdelýshilerge óte qolaıly jaǵdaı jasalǵany qýantty. Mamandar sapaly medısınalyq kómek kórsetti», deıdi amerıkalyq azamat.
«Biz árbir naýqasqa sapaly medısınalyq kómek kórsete otyryp, jaıly atmosfera syılaýǵa umtylamyz. Medısınalyq týrızm – densaýlyǵyńyzdy jaqsartýmen qatar, elimizdiń biregeı mádenıeti men tamyljyǵan tabıǵatyn tamashalaýǵa múmkindik beredi. Eger bizdiń elge medısınalyq týr josparlasańyz, sizge kómektesýge árqashan daıyn ekenimizdi bile júrińiz», deıdi sala mamandary.
Almaty oblysy