«QyzPU basqarma tóraǵasy – rektor Gúlmıra Qanaı ýnıversıtet ujymy men bilim alýshylary belgili ǵalym, pedagog Rozalında Áshirbaıqyzy Shahanovanyń dúnıeden ótýine baılanysty týǵan týystary men jaqyndaryna kóńil aıtady», delingen habarlamada.
Rozalında Shahanova 1951 jyly Pavlodar qalasynda dúnıege kelgen. Ol Almatydaǵy Qazaq qyzdar pedagogıkalyq ýnıversıtetinde (qazirgi QyzPU) «Orys tili men ádebıeti» mamandyǵy boıynsha joǵary bilim alyp, eńbek jolyn qarapaıym mektep muǵaliminen bastaǵan.
Ǵylymǵa adal eńbek etken Rozalında Áshirbaıqyzy 1990 jyly kandıdattyq dıssertasııasyn qorǵap, al 1993 jyly «Qazaq tili men ádebıeti» mamandyǵy boıynsha ekinshi joǵary bilim alǵan. Sol jyly dosent ataǵyna ıe bolǵan. Ol jazǵan ǵylymı jáne ádistemelik eńbekter elimizdiń bilim berý júıesinde keńinen qoldanylady.
2004–2008 jyldary QyzPU oqý-ádistemelik jumys jónindegi prorektory qyzmetin atqarǵan. Zeınet jasyna shyqsa da, ózi túlep ushqan oqý ornymen baılanysyn úzbeı, memlekettik emtıhan komıssııasynyń tóraǵasy retinde stýdentterdiń bilim sapasyn baǵalaýǵa belsendi atsalysqan.
Rozalında Shahanova — kóptegen ǵylymı maqalalar men oqý-ádistemelik quraldardyń avtory. Ol Qazaqstan Respýblıkasynyń bilim berý isiniń úzdigi, «Joǵary oqý ornynyń úzdik oqytýshysy», «Y. Altynsarın» medaliniń ıegeri. Sonymen qatar, «Ǵylymnyń damýyna qosqan úlesi úshin» tósbelgisimen jáne QyzPU damýyna qosqan erekshe úlesi úshin «Qurmet» medalimen marapattalǵan.