Sapaly qyzmet – báseke tiregi

«100 mektep, 100 aýrýhana» baǵdarlamasy aıasynda ashylǵan qalalyq №3 emhana búginde 62 myńnan astam adamǵa qyzmet kórsete alatyn dárejege jetip otyr. Mekemeniń bas dárigeri Álııa TÁShETOVA áńgime barysynda ózge de jaǵymdy jańalyqtarmen tanystyrdy. – Bir kúnde 500 adam qabyldaı alatyn eki qabatty ǵımarat osydan 5 jyl buryn Elbasymyzdyń qatysýymen boı kótergen bolatyn. Memleket basshysynyń 3 sý jańa avtokólik kiltterin tabys ete otyryp, aldymyzǵa bıik maqsattar qoıǵan amanatyna adal eńbekpen jaýap berýge umtylyp kelemiz. Jyl ótken saıyn zamanaýı qondyrǵylarmen qamtý jaqsarýda. Máselen, 2013 jyly bul jónindegi ekono­mıkalyq-tehnıkalyq kórsetishter 77,74 paıyzdy qurasa, byltyr 93,2 paıyzǵa jetti. – 19-shy, 20-shy, Borkı, Sol­nechnyı, taǵy basqa halyq ty­ǵyz qonystanǵan aýdandardy qosqanda emhanaǵa 62602 adam bekitilip berilgen eken. Bul – qala turǵyndarynyń úshten biri degen sóz. Qıyndyq týdyrmaı ma? – Úlkendermen qatar bala­lardyń da densaýlyǵyn qada­ǵalaıtyn mekeme bolǵandyqtan, kúnine 700-800 naýqasqa deıin qabyldaýǵa múmkindigimiz jetedi. Terapııa, áıelder jáne ba­lalar konsýltasııasy, klını­kalyq-dıagnostıkalyq, pro­fı­laktıkalyq, áleýmettik-psıho­logııalyq kómek bólim­deri, laboratorııa jumys isteı­di. Olar­dyń bárine ozyq úlgi­degi qural-jab­dyqtar ornatyl­ǵan. Budan tysqary kardıolog, okýlıst, gınekolog, pedıatr, terapevt, onkolog sekildi óz kásibine mamandanǵan dárigerler naýqastardy qabyldap, em-dom kórsetedi. Eki jyldan beri jalpy dárigerler ýchaskesi tájirıbesi keńinen qoldanylady. Olardyń sany – altaý. Byltyr úı-úıdi aralaýmen, arnaıy shaqyrtýlarmen 18396 adamǵa qyzmet kórsetildi. 17 terapevtik, 14 pedıatrlyq ýchaskeler qurylǵan. Aýrý-syrqaýly jandardyń kezekte turýyn azaıtý maqsatymen bıyldan bastap Call-ortalyq qyzmeti engizildi. – Álııa Jaqsylyqqyzy, al emhananyń kadrlyq áleýeti qalaı? – Bul – elimiz boıynsha ótkir turǵan máselelerdiń biri ǵoı. Joǵary oqý oryndaryn bitirgen dıplomdy jastar kóbine Almaty men Astanany tańdaıtyny jasyryn emes. Bul jaǵynan tapshylyq kórip otyrǵan joqpyz. Búgingi kúni 76 dáriger, 211 meıirbıke jumys isteıdi. Aralarynda óz isiniń bilgirleri kóptep sanalady. Olardyń qataryna ýchaskelik terapevtter Antonına Nıkıevskaıa, Ǵalymjan Ýptııarov, ÝZI dárigeri Ǵalııa Beısenbaeva, ýchaskelik pedıatr Aýgenııa Galdıkaıte, travmotolog Ivan Kolodıı, taǵy basqalaryn ataýǵa bolady. Eki jyl bederinde 8 jas maman jumysqa ornalasyp, árqaısysyna bir jolǵy ótemaqy tólendi. – Tól mereke qarsańynda jetken jetistikterińiz az emes sekildi. – Prezıdent «100 naqty qadam» Ult josparynda densaýlyq saqtaý salasy aldyna naqty mindetter qoıdy. Olardyń ishinde bastapqy kómekti aýrýdyń aldyn alý jáne erte bastan kúresý úshin ulttyq densaýlyq saqtaýdyń ortalyq býynyna aınaldyrý, básekelestik esebinen medısınalyq qyzmettiń qoljetimdiligi men sapasyn kóterý máseleleri ózekti. Ult densaýlyǵy órkendi elimizdiń negizi ekendigine eshkim shúbá keltire qoımas. «Salamatty Qa­zaqstan» baǵdarlamasy sheń­be­rinde balalardy, bala týý jasyn­­daǵy áıelderdi aıyqtyrýǵa, profılak­tıkalyq jumystardy saýatty uıymdas­tyrýǵa basymdyq berilgen. Qazaqstan­dyqtardyń ómir súrý jasyn ulǵaıtý, qaterli aýrýlardyń aldyn alý sharalary da mańyzdy. Dárigerlerge myńdaǵan adamnyń ómiri senip tapsyrylǵandyqtan, bosańsýǵa, toqmeıilsýge esh qaqymyz joq. Gıppokrat antyna adaldyq tanytý – ­basty muratymyz. Áńgimelesken О́mir ESQALI, «Egemen Qazaqstan». Petropavl. Sýretti túsirgen Amangeldi BEKMURATOV.