Kórme taǵy bir elmen tolyqty

Vetnam «EKSPO-2017»-ge qatysatynyn resmı rastady 29-30 shildede «EKSPO-2017» halyqaralyq maman­dan­dyrylǵan kórmesiniń komıssary, Qazaqstan Respýblıkasy Syrtqy ister mınıstriniń birinshi orynbasary Rápil Joshybaevtyń Vetnam Sosıalıstik Respýblıkasyna sapary ótti. Sapar aıasynda Rápil Joshy­baev Vetnam Sosıalıstik Respýb­lıkasy Premer-mınıstriniń orynbasary Vý Dyk Dammen, Mádenıet, sport jáne týrızm mınıstriniń orynbasary Hıýın Vın Aımen, Syrtqy ister mınıstriniń orynbasary Býı Than Shonmen, sondaı-aq, jergilikti iri kompanııalar basshylarymen kezdesti. Vetnam Premer-mınıstriniń orynbasarymen kezdesý barysynda eki eldiń yntymaqtastyǵy men keleshegi máseleleri talqylandy. Vý Dyk Dam ártúrli deńgeıde saparlar almasý Qazaqstan men Vetnam arasyndaǵy qarym-qatynastyń damýyna múmkindik týǵyzatynyn jáne Vetnam úkimetiniń EKSPO-2017 kórmesine qatysý týraly resmı sheshimin qabyldaǵanyn málimdedi. О́z kezeginde, Rápil Joshybaev Vetnamnyń Astanadaǵy halyqaralyq kórmege qatysýy Qazaqstan-Vetnam seriktestiginiń kúsheıýine jańa múmkindik týǵyzatynyn atap ótti. Vetnam Mádenıet, sport jáne týrızm mınıstrliginde vedomstvo basshysynyń orynbasary Vetnamnyń EKSPO-2017 kórmesine qatysatyny týraly ýaǵdalastyqqa qol qoıý jáne eldiń Ulttyq komıssaryn uıymdastyrý máselelerin talqylaý úshin óz eliniń ókilin Qazaqstanǵa jiberýge daıyn ekenin aıtty. Suhbattastar, sonymen qatar, týrızm salasynda birlesken jobalardyń júzege asyrylýy, eki el astanasy arasynda áýe qatynasyn ashý men Qazaqstannyń Vetnamda týrızm áleýetin jaqsartý múmkindigi máselelerin talqylady. Bul rette, qazaqstandyq týrısterdiń Vetnamǵa qyzyǵýshylyǵy artyp kele jatqany atap ótildi. Buǵan qazaqstandyq «Eır Astana» áýe kompanııasynyń 2013 jyldan beri iske qosylǵan Almaty – Hoshımın baǵytyndaǵy áýe qatynasy yqpal etkeni kóldeneń tartyldy. Vetnam Sosıalıstik Res­pý­b­lıkasynyń syrtqy saıasat vedomstvosy basshysynyń oryn­basarymen kezdesýde R. Joshy­baev Vetnamnyń qaıta qurý jolyndaǵy jetistikterin, áleýmettik-ekonomıkalyq refor­malardyń júrgizilip jatqanyn jáne naryqtyq ekonomıkaly memleket qurý jolyndaǵy is-qı­myldardy Qazaqstannyń joǵary baǵalaıtynyn atap ótti. Býı Than Shon Vetnam men EAEO elderi arasyndaǵy qol qoıylǵan erkin saý­da aımaǵy týraly kelisim aıasynda Vetnam úkimeti jaqyn arada Qazaqstan azamattaryna birjaqty vızasyz tártip engizý máselesin qarastyryp jatqanyn habarlady. 2015 jyly 30 shildede «EKSPO-2017» komıssary 70-ke jýyq vetnamdyq kompanııalar qatysqan «Doing Business in Kazakhstan» atty bıznes-forýmda sóz sóıledi. R. Joshybaev Qazaqstannyń ınvestısııalyq ahýaly, vetnamdyq bıznes úshin saýda, ınvestısııa jáne týrızm múmkindikteri men Qazaqstannyń «EKSPO» kórmesine daıyndyǵy týraly habardar etip, Vetnam isker toptaryn kórmege qatysý sharttarymen tanystyrdy. Forým sheńberinde «EKSPO-2017» atty taqyryptyq tusaýkeser men Qazaqstannyń halyqaralyq kórmege daıyndyǵy jaıly beınerolık kórsetildi. Forým qorytyndysy boıynsha «Astana EKSPO-2017» UK» AQ pen Vetnamnyń «Saigontourist» jetekshi týrıstik kompanııasy arasynda yntymaqtastyq týraly memorandýmǵa qol qoıyldy. R.Joshybaev, sonymen qatar, vetnamdyq «VTV1» jáne «VTV4» iri memlekettik telearnalaryna suhbat berdi. Osy arada atap kórsetetin jaıt, Vetnam Halyqaralyq kórme bıýrosynyń (HKB) múshesi bo­lyp tabylady. Eldiń HKB aıasyn­da uıym­dastyrylǵan «EKSPO» kór­melerinde jınaq­ta­ǵan tájirıbesi mol. Vetnam pavılondary sońǵy 4 kórmede myna qalalarda: Sara­gosa (Ispanııa), Shanhaı (QHR), Iosý (Ońtústik Koreıa) jáne Mılan (Italııa) usynylǵan bolatyn. Qazaqstan men Vetnam ara­syn­­daǵy taýar aınalymy 2015 jyldyń qańtar-sáýir aılaryn­daǵy kórsetkish boıynsha 73,7 mln. dollardy qurady (Qazaqstannan eksport 495,3 myń dollar, Qazaq­stan­ǵa ımport 73,3 mln. dollar), 2014 jyly 271,9 mln. dollar (eksport – 1,7 mln., ımport – 270,2 mln.), 2013 jyly 233,3 mln. dollar, al 2012 jyly 121,9 mln. dollar. Sáýlebek BIRJAN.