Jaqynda M.Áýezov atyndaǵy Ońtústik Qazaqstan zertteý ýnıversıteti men koreılik «Hıon» kompanııasy arasynda «Aqyldy jasyl ferma» jobasy boıynsha yntymaqtastyq týraly memorandýmǵa qol qoıyldy.
Jobanyń maqsaty – eki el ýnıversıteti arasynda áriptestik baılanys ornatyp, ǵylymı tájirıbe almasý. Sondaı-aq agro mamandyǵynda oqıtyn stýdentterge organıkalyq jolmen ónim alýdyń tyń tásilin úıretý. Is-sharaǵa ýnıversıtet ujymy men Koreıadan kelgen qonaqtar jáne jergilikti kásiporyndardyń ókilderi qatysty.
Ásirese bul kezdesý bizdiń agroónerkásip kesheni ókilderiniń qyzyǵýshylyǵyn týǵyzdy. Sebebi tabıǵı ónim óndirý arqyly otandyq taýardyń sapasyn arttyra alamyz. Sondyqtan shymkenttik kásipkerler «Aqyldy jasyl ferma» jobasyna aıryqsha nazar aýdardy. Bul joba arqyly stýdentter ǵana emes, bıznes ókilderi de osy bastama sheńberinde tájirıbe almasýǵa bolady.
M.Áýezov atyndaǵy OQZÝ basqarma tóraǵasy-rektor Darhan Ahmed-Zakı Memleket basshysynyń qoldaýymen otandyq ǵylym jańasha serpin alǵanyn atap ótti.
«Qazir bizdiń ǵalymdardyń belsendiligi joǵary. Olar seriktesterimen birlesip, jańa ǵylymı jobalardy iske asyrýǵa septesip jatyr. Budan eki jyl buryn professor Rae Kvon Chýng «jasyl energııany» paıdaǵa jaratý arqyly aýyl sharýashylyǵyn damytýǵa bolatyny týraly usynys bildirgen edi. Nátıjesinde, bıyl ınvestormen birge jańa tehnologııany qoldana otyryp, «aqyldy fermany» bizdiń ýnıversıtette qalyptastyrsaq deımiz. «Aqyldy jasyl fermanyń» ónimderin ósirýde pestısıdter, hımııalyq zattar paıdalanylmaıdy. Sondaı-aq osy júıe aıasynda 90 paıyzǵa deıin sýdy únemdeýge bolady», dedi ol.
Is-shara barysynda ferma qurylysynyń irgetasyna kapsýla salý rásimi ótti. Bul keshende jasyl maqta, vasabı men qulpynaı ósiriledi. Professor Rae Kvon Chýng fermada óndiriletin jasyl maqtaǵa erekshe toqtaldy. Onyń aıtýynsha, búgingi tańda joǵary sortty ónimge Lýı Veton sekildi álemdik brendtik fırmalar qyzyǵýshylyq tanytyp otyr eken. Al oǵan qajet qural-jabdyqty koreıalyq kompanııa óz esebinen jetkizedi.
ShYMKENT