* 21 maýsym – Medısına qyzmetkeri kúni
Densaýlyq – adam úshin asyl baılyq
ULT DENSAÝLYǴY – BIZDIŃ TABYSTY BOLAShAǴYMYZDYŃ NEGIZI
Densaýlyq saqtaýdyń ulttyq júıesin uzaq merzimdi jańǵyrtý aıasynda biz eldiń barlyq aýmaǵynda medısınalyq qyzmetter sapasynyń biryńǵaı standarttaryn engizýge, sondaı-aq, medısına mekemeleriniń materıaldyq-tehnıkalyq jabdyqtalýyn biryńǵaılandyrýǵa tıispiz. Negizgi basymdyqtar: *Sapaly jáne qoljetimdi medısınalyq qyzmetter kórsetýmen qamtamasyz etý. *Aýrýlar túriniń barynsha keń spektrin dıagnostıkalaý jáne emdeýmen qamtamasyz etý.N.NAZARBAEV
«Qazaqstan-2050» Strategııasynan.
Kóp jaǵdaı emdelýshiniń ózine tikeleı baılanysty
Búginde Jambyl oblysy halqynyń densaýlyǵy úshin 42 aýrýhana, sonyń ishinde 10 ortalyq aýdandyq aýrýhana jáne 7 aýyldyq aýrýhana, sondaı-aq, 377 ambýlatorııalyq emhana qyzmet kórsetedi. Árıne, densaýlyq saqtaý salasynyń negizgi baǵyttarynyń biri – turǵyndardyń ortasha ómir súrý jasyn ulǵaıtý ekeni anyq. 2014 jyly turǵyndardyń ómir súrý uzaqtyǵy ósip, 69,6-ny qurady. – Sondyqtan búgingi kúni densaýlyq saqtaý salasyndaǵy eń basymdy baǵyttardyń biri – ana men balanyń densaýlyǵyn qorǵaý bolyp tabylady, – deıdi Jambyl oblystyq densaýlyq saqtaý basqarmasynyń basshysy Erlan Masalımov. – 2015 jyldyń 4 aıynda analar óliminiń kórsetkishi 47,5 paıyzǵa tómendedi. Qazir oblys halqyna medısınalyq kómekti 2751 dáriger jáne 9834 orta býyn qyzmetkerleri kórsetýde. Sondaı-aq, jyldan-jylǵa jas mamandar sany da ósýde. О́tken jyly oblysqa 121 jas maman kelse, onyń 73,6 paıyzy aýyldyq jerlerge jumysqa ornalastyryldy. – О́ńirlerde medısına salasynyń qurylystary bir sát te báseńsigen emes. Osy baǵyttaǵy jumystardy bir naqtylaı ketsek. – 2014 jyly jergilikti bıýdjetten quny – 1 301,3 mln. teńgeni quraıtyn 25 nysannyń qurylysy júrgizildi. Onyń ishinde 7 dárigerlik ambýlatorııa, 1 feldsherlik-akýsherlik pýnkt jáne 17 medısınalyq pýnkt bar. Al bıyl jobadan tys respýblıkalyq bıýdjet esebinen Taraz qalasyndaǵy 300 tósektik qalalyq kópsalaly aýrýhana, 200 tósektik oblystyq perınataldyq ortalyǵy jáne Talas aýdany Qarataý qalasyndaǵy 250 kelýshige arnalǵan aýdandyq ortalyq emhana qurylystary júrgizilýde. Alǵashqy eki qurylys jumystary aǵymdaǵy jyldyń ekinshi jartyjyldyǵynda aıaqtalady. Sondaı-aq, jergilikti bıýdjetten 707,3 mln. teńgege Baızaq aýdanyndaǵy 60 tósektik týberkýlezge qarsy aýrýhana qurylysy júrgizilýde. Bul qurylys ta osy jyldyń qazan aıyna deıin aıaqtalady dep kútilýde. Jalpy alǵanda, respýblıkalyq jáne jergilikti bıýdjet esebinen 2010-2014 jyldary aralyǵynda 74 densaýlyq saqtaý nysanynyń qurylysy iske asyryldy. – Qazir elimizde «Ulttyq skrınıngtik baǵdarlama» dep atalatyn jańa júıe jumys jasap jatyr. Bir sózben aıtqanda, skrınıng – bul belgili bir jastaǵy deni saý adamdardy profılaktıkalyq medısınalyq tekserilýden ótkizý... – Iá, oıyńyzdy túsindim. Bizdiń elde turǵyndar turǵylyqty mekenjaılary boıynsha ózderi tirkelgen medısınalyq uıymdarda skrınıngtik tekserilýden tegin ótkiziledi. Máselen, Qazaqstanda búginde qaterli isikpen aýyratyn 145 myńǵa jýyq adam tirkelgen jáne jyl saıyn bul kórsetkish shamamen 3-4 paıyzǵa ósip otyrǵany jasyryn emes. Skrınıngtik tekserilýden ótý arqyly onkosyrqattardyń aldyn alýǵa bolady. Mamandardyń aıtýynsha, Qazaqstanda jyl saıyn ókpe ragymen aýyratyn 350-ge jýyq adamǵa operasııa jasalady eken, ıaǵnı naýqasy bastapqy satyda anyqtalǵan adamdardyń 5 paıyzyna ǵana ota jasalǵan. Turǵyndardyń el ekonomıkasynyń ósýimen qatar, densaýlyq saqtaý júıesiniń nyǵaıýyn, al medısınalyq qyzmetterdiń meılinshe qoljetimdi ári sapaly bolýyn qalaıtyny anyq. Bul rette biz de qoǵam bolyp, memleket bolyp osy mindetti sheshý baǵytynda jumys isteýge tıispiz. О́ıtkeni, halyqtyń densaýlyǵy – elimizdiń basty baılyǵy. Al, osy baılyqtyń jaqsarýy, eń aldymen, ár adamnyń ózine baılanysty. Densaýlyq saqtaý salasyn, dárigerlerdiń biliktiligin qansha kótergenimizben, halyq densaýlyǵynyń jaqsarýy osy nársege kep tireledi. Sondyqtan kez kelgen aýrýdyń aldyn alý, júıeli túrde óz densaýlyǵyn teksertip turý, salamatty ómir súrý – búgingi árbir azamattyń ómir súrý qalybyna aınalýy tıis. Áńgimelesken Oralhan DÁÝIT, «Egemen Qazaqstan». Jambyl oblysy.