Jaqynda elimizde ábden tozǵan 125 temirjol vokzalyna kúrdeli jóndeý jumystary bastalady. Olardyń qatarynda Aqtóbe oblysyndaǵy Alǵa, Aqtóbe, Embi, Qandyaǵash, Jem, Qaraýylkeldi, Shubarqudyq vokzaldary da bar.
Bul jóninde Kólik vıse-mınıstri Sátjan Ablalıev Aqtóbe oblysynyń turǵyndarymen kezdesýinde málim etti. Vıse-mınıstr byltyr elimizde temirjoldaǵy jolaýshylar tasymaly 7%-ǵa óskenin, soǵan qaramastan poıyz vagondarynyń eskirýi, bılet tapshylyǵy joıylmaı kele jatqandyǵyn da aıtyp ótti. Kólik mınıstrligi tarapynan qoldanylyp jatqan is-shara – bıylǵy jaz maýsymynda qosymsha 21 vagon qosylady.
«Qazirgi qoldanystaǵy jolaýshylar vagondarynyń 42%-y eskirgen. Jasyratyny joq, 30-40 jyl buryn shyqqan vagondar áli jolda júr. Osy olqylyqty joıý maqsatynda kezeń-kezeńimen jańalaý jumystary josparǵa engizildi. «QTJ» UK byltyr 143 vagon satyp alsa, bıyl 226 vagon alýdy josparlap otyr. Astana, Petropavl qalalarynda vagon qurastyrý zaýyty iske qosyldy. Petropavl zaýyty alǵashqy vagondaryn osy jyldyń sońynda «Almaty – Saratov» poıyzyna tirkese, Astanadaǵy óndiris kelesi jyly «Almaty – Atyraý», «Almaty – Aqtóbe» poıyzdaryna qosady degen jospar bar», dedi S.Ablalıev.
Aıta ketý kerek, 2030 jylǵa deıin elimizde jolaýshylar poıyzy vagondarynyń 80%-y jańalanady.
Aqtóbe oblysy