«Egemenniń» Oral qalasyndaǵy tilshi qosynyna jas jigit keldi. Aman-saýlyq biliskennen keıin myna bir kún saıynǵy qym-qýyt jańalyqtary bar ómirde bárinen asyp túsetin «tyń jańalyq» aıtty.
Ne jańalyq? – dep surańyz. Ákesiniń ákesi, ıaǵnı atasy ólgenderdiń tiziminde joq kórinedi. 1984 jyly burynǵy 24 partsezd sovhozy, qazirgi Birik aýyldyq okrýginde redaksııaǵa kelgen jas jigittiń atasy dúnıe salypty. Arýlap, jerlegen. Týma-týystary, urpaqtary zırat basyna baryp, duǵa etedi.
Endi 30 jyl ótken o dúnıelik bolǵan qart kimge kerek bolyp qaldy?.. Nemeresi áskerı boryshyn ótep kelgen soń shekara qyzmetine qalmaqshy eken. Shekarashy bolý úshin onyń arǵy tegin tekseretin kórinedi. Bylaısha aıtqanda, bulardyń teginde «shpıon», «tyńshy», t.b. sııaqty «kúdiktiler» bolmaý kerek... Nemeresiniń (jigittiń) aıtýynsha, arǵy tekterinde «shpıon» joq eken. Biraq tártip solaı, qujattyń bári zańdylyqqa sáıkes resimdelý kerek.
Tıisti organdardan atasynyń qaıtys bolǵandyǵy týraly anyqtama alaıyn dese, 1984 jyly myńdaǵan adam turǵan qazirgi Birik aýyldyq okrýginde tek 2 adam ǵana qaıtys bolǵan degen anyqtama jazylǵan. Bul qandaı aqylǵa syıady? Eshkim de máńgilik emes. О́mir bar jerde, ólim bar emes pe?! Atasynyń ómirden ótkeni týraly eshqandaı qujattyń joqtyǵyna kim kináli?
Qyzyqty qarańyz. Álginde aıtqanymyzdaı, rasynda da úsh iri eldi mekeni bar aýylda bir jylda eki adam ǵana dúnıeden ótedi degenge sený qıyn-aq. Endi shekara qyzmetine barǵysy keletin jigit atasynyń qaıtys bolǵany týraly qujat bolmaǵandyqtan, daǵdaryp otyr.
Apyrym-aı, sonda dúnıeden ótken atasynyń qujaty joqtyǵynan óz eliniń shekarasyn qorǵaýǵa nıet bildirip otyrǵan jigittiń maqsaty tabanǵa taptalatyn bolǵany ma? Álde sonaý ótken ǵasyrdyń 80-shi jyldarynda Birik aýyldyq okrýginde «Kasheı Bessmertnyılar» ómir súrdi me?! Eger olaı bolsa, olar osy kúnge deıin aramyzda zeınetaqylaryn alyp júrmeı me?..
Temir QUSAIYN,
«Egemen Qazaqstan».
Batys Qazaqstan oblysy,
Qaztalov aýdany,
Ájibaı aýyly.