Qaradala halqynyń negizgi kásibi – órik ósirý. Jer-Anaǵa jylý boılaǵan sáýir aıynyń orta shenine taman búr jaryp, aınalaǵa aıyryqsha kórik beretin órik aǵashtarynan mol ónim alýdyń qam-qareketine sharýalar bilek túre kirisip ketken. Talaılardy tamsantqan sary órikti bul óńirdiń brendi deýge bolady. Jyl saıyn 500-den asa sharýa qojalyǵy ósirgen myńdaǵan tonna ónim ishki naryqty qamtamasyz etip, alys-jaqyn shetelge de jóneltiledi.
«Qazir aýdanda 4 300 gektar baq bar. 3 500 gektary – shabdaly baǵy, onyń ishinde 2 350 gektary jemis beredi. Osy alqaptan jylyna 19-22 myń tonnaǵa deıin ónim alamyz. Deni ishki naryqqa jiberilse, 4 myń tonnaǵa jýyǵy Reseıge eksporttalady. Jyldan jylǵa shabdaly ósirýge nıettenýshiler kóbeıip keledi. Sebebi sary órikke suranys eselep artyp jatyr», dedi Aýyl sharýashylyǵy bóliminiń bas mamany Farhat Aqmollaev.
Osy kúni órik alqabynda jer jyrtyp, topyraq qopsytyp, kóshet otyrǵyzý jumystary qyza túsken. Baqty balasha baptasa ǵana mol ónim beretindigin alǵa tartqan dıqandar, erte kóktemnen bastap zııankesterge qarsy zalalsyzdandyrý men mıneraldy tyńaıtqyshtar sebý sharalaryn ýaqtyly atqarýǵa judyryqtaı jumylǵan.
«Shyryngúl» sharýa qojalyǵynyń meńgerýshisi Saıdýlla Muqpulovtyń aıtýynsha, sharýashylyqta tuqymdyq tálimbaq bar. Onda ósirilgen joǵary sapaly ári tasymalǵa tózimdi «krasnoshekıı» sortynyń kóshetteri óz baqtarynda otyrǵyzylyp, artylǵany ózge sharýashylyqtarǵa satylady eken. Tabys kózine aınalǵan sary órikti jınap, tasymaldaýda jáshik tapshylyǵyn joıýdy maqsat etken sharýa qojalyǵynyń ıesi 50 mln teńge ınvestısııa quıyp, bıyldan bastap plastık jáshik shyǵarýdy bastap ketipti.
Avat aýylyna qarasty «Bahıt» sharýa qojalyǵy bıyl da mol ónim alýdan úmitti.
«Byltyr shabdaly jaqsy ónim berdi. Tek Avat aýylynyń ózinen 37 fýra jóneltildi. Baǵasy kılosyna 250–300 teńge shamasynda boldy. Bıyl órik aǵashtary jaqsy gúldedi. Endi úsik uryp ketpeýin tileımiz. Bir gektar baqtan orta eseppen 10–15 tonnaǵa deıin ónim alýǵa bolady», deıdi sharýa qojalyǵynyń jetekshisi Saıdahmet Mustafaev.
Almaty oblysy